As chuvias de xullo superaron o valor medio dos últimos 30 anos

Cristina López

A MARIÑA

07 ago 2007 . Actualizado a las 02:00 h.

lugo | Desde o punto de vista da meteoroloxía, xullo foi en Lugo un mes frío en canto ás temperaturas e moi húmido polo que respecta ás precipitacións rexistradas. Unhas precipitacións que superaron amplamente o promedio dos últimos trinta anos e que estiveron moi por encima das que se deron no mesmo mes do ano pasado.

Os 39 litros por metro cadrado acumulados en xullo en Lugo sitúan as precipitacións do pasado mes a bastante distancia dos 23 litros por metro cadrado, valor medio dos últimos 30 anos. A diferenza é aínda maior se se comparan as precipitacións de xullo deste ano coas deste mes do 2006, no que se rexistraron pouco máis de seis litros por metro cadrado.

Polo que se refire ás temperaturas, foron moi inferiores ao agardado, sobre todo comparadas coas de xullo do 2006, aínda que non tanto se se toman como referencia os valores climáticos dos últimos 30 anos. A maior diferenza neste caso dáse na temperatura máxima absoluta, que foi de 31,6 graos no mes pasado, fronte aos 39 que se rexistraran de máxima en xullo de 1990. A media situouse unicamente un grao e medio por debaixo; mentres que a mínima absoluta foi incluso superior en 3,3 grados ao promedio da última trintena.

Das diferentes estacións meteorolóxicas repartidas pola provincia lucense, as que rexistraron maiores precipitacións foron as do Courel, con 104 litros por metro cadrado, e a de Pol e a de Pedro Murias, en Ribadeo, ambas con 88 litros por metro cadrado. Os niveis máis baixos de chuvia acadáronse nas estacións do Marroxo, en Monforte, e Sambreixo, en Guitiriz, con 17 litros por metro cadrado, e na de Bóveda, con vinte.

Polo que fai referencia ás temperaturas, entre as mínimas, a media máis baixa rexistrouse na estación guitiricense de Sambreixo, con 8,4 graos, seguida da dos Ancares, con 9,2, e a de Bóveda con dez. En canto ás máximas, a media máis alta obtívose na estación monfortina do Marroxo, con 24,4 graos. Por detrás estiveron Lugo e Bóveda, con 24,2 e 24,1 graos, respectivamente.