Tamén Verín e Ponteareas se estrean
22 mar 2017 . Actualizado a las 05:00 h.Como novidade respecto de 2016, as Feiras do Libro de Galicia van chegar este ano aos concellos de Verín, de Mondoñedo e de Ponteareas, mentres que a cidade de Pontevedra non se incorpora ao circuíto.
Polo que respecta da Mariña, Mondoñedo sumarase este ano ás feiras do libro de Viveiro e de Foz. Ribadeo tamén terá a súa feira do libro exclusivamente en galego, esa é a súa excepcionalidade.
O percorrido polas catro provincias galegas iníciase o 31 de marzo e a súa primeira parada será o concello de Verín, onde permanecerá até o 2 de abril; do 19 ao 23 de abril estará en Ferrol. Na capital de Galicia a cita será desde o 29 de abril ata o 7 de maio. No mes das Letras tamén será a quenda das feiras de Lugo, do 16 ao 21 de maio, e de Ourense, do 31 de maio ao 4 de xuño. Redondela celebrará a súa feira do libro entre o 8 e o 11 de xuño e posteriormente terán lugar as feiras de Ribeira, do 22 ao 25 de xuño; Vigo, do 29 de xuño ao 8 de xullo; e de Ponteareas, do 27 ao 30 de xullo. No mes de agosto serán as feiras do libro da Coruña, do 1 ao 10; de Viveiro, do 13 ao 16; de Foz, do 17 ao 20; e de Monforte, que pechará a edición de 2017 entre os días 23 e 26 deste mes estival.
O novo calendario de feiras do libro forma parte dunha estratexia integral de apoio ao sector editorial galego.
Tamén forma parte desta estratexia a presenza da comunidade nas feiras internacionais do libro. En concreto, o sector editorial galego participará en 2017 cun stand propio nas feiras de Boloña (do 3 ao 6 de abril), Buenos Aires (do 25 de abril ao 15 de maio), Frankfurt (do 11 ao 15 de outubro) e a cita mexicana de Guadalaxara (do 25 de novembro ao 3 de decembro).