«Esta é unha obra sinxela, que dura uns cinco minutos, é fácil de escoitar e ademais transmite felicidade»
VIVEIRO
O xove músico de Viveiro estrea mañá a súa primeira obra, para o grupo de clarinetes, titulada «8-Bit Entertainment»
04 mar 2015 . Actualizado a las 05:00 h.Julián González Díaz (Viveiro, 1995) é un músico novo do que o director do Conservatorio de Viveiro, Antonio Álvarez, non dubida en dicir que «é un xove que promete». A piques de rematar a súa formación no Conservatorio de Viveiro e coa mira posta na formación superior para adicarse á composición, maña estrea a súa primeira obra, «8-Bit Entertainment» que interpretará o grupo de clarinetes deste centro de formación musical. Julián di que é unha obra «sinxela, fácil de escoitar, e que transmite felicidade». Toca a gaita, pero a súa paixón é a composición.
-Din que vostede é unha xove promesa da música, ¿que opina?
-Non sei. Sempre estiven en contacto coa música, empezaría ao mellor no coro do Lois Tobío, e na Banda Naval. Desde hai dez anos estudo no Conservatorio e quero facer as probas para ir ao conservatorio superior cando acabe este curso. Non sei si ao de A Coruña, a Vigo ou a Oviedo.
-Pero o de compoñer non é o máis habitual.
-Sempre me gustou crear. A música, en comparación con outras cousas ,dáseme ben, non hai queixa.
-¿Como empezou a compoñer neste caso?
-Como a maioría do que empezo, estaba por aí e vou apuntando o que se me vai ocorrendo. O difícil é empezar a crear, ter con qué facelo.
-¿E como é esta primeira obra que estreará co grupo de clarinetes do Conservatorio?
-É unha obra sinxela, que dura uns cinco minutos, é fácil de escoitar e ademais transmite felicidade. Aínda toco a gaita esta obra é para clarinete por funcionalidade, aproveitando que había un grupo no Conservatorio. E teño que darlle o meu infinito agradecemento ao cuarteto, porque está moi ben mirada a obra (refírese ao traballo de preparación da obra para o concerto).
-¿Traballa noutros proxectos?
-Si, estou empezando a facer unha obra de piano e violín, coa que pretendo presentarme á proba para entrar no Conservatorio superior.
-Unha curiosidade, ¿ten vostedeunha nota preferida na escala musical?
-(Pensa un pouco) Si, gostame a Do. Cando penso nunha nota sempre o fago en Do, é como moi clásica.