Os play-offs da LEB Prata, as series ás que se aferran do segundo ao noveno clasificados da fase regular para acompañar o campión no gran salto á LEB Ouro, veñen de confirmarse coma un hábitat fértil para as grandes sorpesas. Como a que este ano deron o Zornotza S.T., desde o pasado verán co ata entón capitán do Xuven Cambados Juanchi Orellano nas súas filas, e o ULSA Valladolid. Sexto e sétimo clasificados respectivamente na fase regular, que desde o venres dirimirán, ao mellor de cinco partidos, quen segue os pasos do primeiro clasificado da Liga, o Sammic ISB.
Na noite do martes o Zornotza S.T. deu a gran sorpesa, ao tumbar ao gran favorito, o Covirán Granada, o único supervivinte nas semifinais dos catro equipos que arrincaran os play-offs co factor cancha ao seu favor, nun quinto partido disputado en cancha nazarí con 81-92 no marcador. O ULSA Valladolid si soubo ampararse no calor da súa afección no partido do k.o., e á beira do Pisuerga, venceu 95-74 o Aceitunas Fragata Morón, o verdugo do Xuven nos cuartos de final.