«Confórmome con gañar. Se é cun 0-1 de penalti no derradeiro minuto, váleme». Manuel Abalo, Arousa
VILAGARCÍA DE AROUSA
Manolo Abalo (Vilagarcía, 18 de setembro de 1951) leva na presidencia do Arousa desde o 2010, pero o seu historial directivo nas oficinas da Lomba esténdese durante décadas. Por iso, non lembra xa cantos derbis comarcais leva enriba.
-Un punto sumado de cada tres en xogo nas once últimas xornadas. O Arousa dista de ser ese equipo que ía pelexar por entrar na fase de ascenso...
-Ben... A verdade é que non tivemos moita sorte nos últimos partidos. Por unhas circunstancias ou por outras. Quédome con que o equipo o está a tentar. Por actitude non hai nada que reprocharlle, dáo todo. Haberá que resignarse, e agardar a que cambie a sorte. Xa o diciamos ao principio, que ao final de tempada habería que ver se a sorte nos acompañaba. De momento estános a esquivar. Hai que seguir pelexando.
-Entón ¿a que aspira agora o Arousa?
-Eu son sempre optimista. Creo que se encadeamos tres vitorias podemos meternos arriba. Se encadeamos tres derrotas tamén podemos meternos abaixo. En principio a que aspira o Arousa, a gañar partidos para non pasar problemas por abaixo, e meternos arriba. Eu non descarto nada.
-O veciño e rival encadea sete xornadas sen perder. Vostedes sácanlle 5 puntos na clasificación. ¿Quen é o favorito no Ribadumia-Arousa deste domingo?
-Nos partidos de rivalidade non existe favorito. Pode gañar o que está por abaixo sen problema. É máis, canto máis apretado é cando ao mellor o tentas máis. E sei que o Ribadumia está xogando ben ao fútbol. Ao mellor os favoritos nesta ocasión son eles. Ti o dixeches, eles nos sete últimos partidos non perderon, e nós dous o tres.
-O Ribadumia deu fichado no derradeiro día do mercado de inverno, vostedes non. É máis, na Lomba tiveron que conformarse cun lateral que levaba un mes na Terceira Autonómica e outro con oito meses no dique seco. ¿Que foi daquilo de que todo o mundo quere vir xogar o Arousa?
-Home. Segue a ser así. O único problema é que o Arousa ten un orzamento, que quere cumprir, e con toda a xente. Os que están lesionados seguen a cobrar coma se estivesen xogando. E logo hai unha cousa clara, fichar por fichar, xa dixemos que non o iamos facer. Que de fichar fariámolo para traer futbolistas que viñesen mellorar o que temos. E por unhas circunstancias ou por outras non se deron eses xogadores.
-Para o Arousa ¿o da Senra é outro partido de 3 puntos, ou un deses encontros que poden marcar o equipo?
-Tres puntos. Son 3 puntos importantes. O que gañe sairá contento, e o que non sume non sairá contento, e coa cabeza baixa.
-¿Que tipo de partido agarda?
-Vai ser un partido de moita tensión, no que os dous equipos quererán gañar. Típico partido de rivalidade. Seguramente non se xogará tan ben como outros partidos. O que desexo é que sexa un partido fermoso, e se non, que sexa emocionante.
-Un resultado...
-Confórmome con gañar. Dáme igual o resultado. Se é 3-4 mellor, porque sería bonito para o público. Pero se é cun 0-1 de penalti no derradeiro minuto, váleme.