Na primeira entrega para esta sección de El periódico en casa falamos dos menús que as noticias ofrecen para as diferentes idades. Un exemplo para os pequenos de 3 a 5 anos propuxémolo na segunda entrega, ao falar da identificación das palabras, distinguindo entre a palabra que se di e repite en alto e a imaxe que esa palabra ten nun conxunto de letras: cando o neno di auga e a ve nun vaso tamén pode vela escrita nun titular. Pero aínda non chegamos a que o neno se interese polo que constitúe a noticia, o cal virá máis tarde, e que ten varias fases previas. Unha destas fases previas é lograr que o pequeno poida intuír que lles pasa os seus pais, ou os seus avós, que están aí talvez colocándose as lentes e co xornal na man, e oe que lle din: «Non molestes a fulano, que está lendo o xornal».
- Para moitos, a maior motivación do xornal en familia non está en que sirva de instrumento para aprender a ler e logre o coñecemento dun alfabeto áxil e adiantado para os futuros estudantes, por moi importante que isto sexa. Nin tampouco lograr que os fillos pequenos atopen no periódico seccións, imaxes, palabras, títulos que lles resulten máis ou menos divertidos, por moi divertido que poida resultar.
- A maior motivación do xornal en casa, polo menos no que se refire a nenos pequenos, está en que vexan, comproben, se fixen en que os seus pais e maiores len o xornal. E que se pregunten: «¿Que terán eses papeis que nin mamá nin papá me toleran que os deixe en calquera parte, nin por suposto os tire na papeleira, aínda que o vexa no chan?».
- O máis importante, a dicir de moitos, non é aprender a ler co xornal, senón entender por que o len, con tanto interese, os pais e maiores.
DOUS MÉTODOS
Existen, polo menos, dúas clases de programas para que os pais poidan axudar aos seus fillos co xornal en casa:
- Saber ler. Uns son, máis ou menos, unha aplicación dos programas xerais de ensinar a ler, aplicando as súas actividades á lectura do xornal, tendo en conta as diversas idades dos seus fillos. Son programas sobre saber ler.
- Saber ler o xornal. Outros programas diríxense expresamente á lectura directa do xornal, desde actividades moi sinxelas para os máis pequenos con exercicios sobre as letras, títulos e fotos ata a análise e discusión dunha noticia e a súa repercusión na sociedade e na vida propia dos fillos adolescentes. Son programas que axudan a saber ler o xornal.
CATRO ETAPAS
- O bebé que non sabe ler: onde incluso adoitan aparecer os debates sobre a que idade é conveniente acelerar o proceso de lectura.
- O neno que empeza a ler: e decátase pola súa conta polo menos dos títulos e dos textos que explican mellor que pasa na foto.
- O alumno que xa le só e busca as súas seccións de noticias, aínda que non coincidan coas nosas.
- A adolescencia, coas súas formas e fontes diversas de decatarse xa das noticias e discutir sobre elas, e talvez meternos en apertos.