É tempo de agasallos... naturais

As festas máis familiares do ano están ao virar a esquina. ¿Empezaches a redactar xa as túas cartas aos Reis Magos e a Papá Noel? Como faltan unhas semanas, é probable que aínda non... En tal caso, e se es dos que notan que latexa no seu peito o espírito naturalista e as ganas de aventuras por bosques, ríos e montañas, nestas dúas páxinas propómosche algúns agasallos que podes pedir tanto para ti como para as persoas que máis queres.

Son agasallos algo diferentes a outros. Algúns, por exemplo, teñen unha relación calidade-prezo incomparable con calquera deses que aparecen en tantos e tantos catálogos dos que estas datas enchen as caixas de correos. Outros serven á vez para pensar, facer exercicio e flipar co que ves. Hainos que che achegan ao que parece moi afastado. Ou que che converten en grande o máis pequeno. Ou que che descobren fíos invisibles que che unen a lugares moi remotos do planeta.

Algúns son estupendos para soñar e aprender ao mesmo tempo. Moitos deles, ideais para compartilos coa túa familia e amigos. Todos, ademais, son estupendos para a túa saúde. Porque te achegan máis á natureza.

Tamén son, por iso mesmo, un agasallo para a propia natureza. Porque a nosa biodiversidade necesita de máis e máis persoas que a comprendan, investiguen e coiden. Que a percorran con respecto, curiosidade e admiración. Que a consideren parte do seu fogar, parte da súa familia. E que xa que logo celebren tamén con ela estas festas.

>UN CÓDIGO ÉTICO PARA COIDAR DA NATUREZA DURANTE AS TÚAS EXCURSIÓNS

A ninguén lle gusta saber que durante a súa visita a un lugar causou sen querer algún problema grave. Na natureza sucédelle a miúdo a quen non o pensa dúas veces antes de facer algo.

Por sorte, abundan en Ias listas de ideas para evitalo. Trátase de coleccións de consellos moi útiles para estar seguros de que aproveitamos os nosos agasallos do mellor xeito posible. Son tamén un estupendo agasallo co que contemplar todos os anteriores.

Estas son dúas delas:

• Código ético do observador de aves, de SEO/BirdLife: (goo.gl/evP6Qw)
• Manual de boas prácticas en fotografía de natureza, da asociación AEFONA: (goo.gl/EdQz62) 

Agasallos para pasear

• Pídeche un paseo xuntos polo campo con quen máis che apeteza. A túa familia, os teus amigos... Buscade un destino que inclúa bonitas paisaxes e rutas fáciles de percorrer para todos.
• Non tes aínda unhas boas botas de campo? Pois apúntaas na carta. Unhas botas de goma de media cana son estupendas para estes meses húmidos. Hainas ben baratas. Tamén existen chuvasqueiros e mochilas a prezos estupendos. ¡Non esquezades auga e unhas provisións!
• Outra boa idea son esas aplicacións para móbil que che axudan tanto a non perderte como a recoñecer e identificar boa parte da fauna e flora que atopes nos teus paseos. Hai uns meses propuñámosche nestas mesmas páxinas algunhas das mellores, que ademais son gratis (goo.gl/evP6qW).

 Para ter onde apuntar

• Un caderno de campo no que poder apuntar todas as túas observacións, dúbidas ou ideas. É dicir, como toda persoa chea de curiosidade científica polo vivo. Nel anotarás o día e a hora de cada visita, onde estás, con quen, o que vedes e escoitades... Deste xeito, todos eses datos permanecerán ben gardados para cando os necesites.
• Un caderno de debuxo, unhas acuarelas e mais pinceis, se a miúdo te sentes ademais inspirado pola fermosura de paisaxes, flores ou criaturas. Moitos naturalistas son, á vez que científicos perspicaces, verdadeiros artistas capaces de retratar cada detalle ou cada luz.

Para ler

• Inclúe na túa lista guías de campo de aves, insectos, árbores, flores, anfibios e réptiles... ¡E de pegadas e sinais de todo tipo de animais! Verás que divertido é aprender a identificar as diferentes criaturas que che atopes e os seus rastros.
• Que non falten ademais, para os máis pequenos da casa, libros ilustrados que lles animen a sentir curiosidade pola natureza e acudir ao seu encontro.
• Os máis maiores gozarán ademais moito con novelas e ensaios relacionados co mundo natural. En todas as librerías hai por exemplo excelentes obras de viaxes a espazos naturais, ou tras os pasos das aves, ou análises que abordan en profundidade os motivos da perda de biodiversidade, e o que cada un de nós pode facer por evitalo.

Agasallos para escoitar

• Os cedés ou coleccións de MP3 con cantos, reclamos e outras voces de aves ou anfibios, por exemplo, son ideais para educar o teu oído como preparación para as túas xornadas de campo. A lista de aplicacións para móbil de máis arriba inclúe algunhas que traen moitos sons incorporados.
• A música de autores clásicos como Messiaen, Mozart ou Vivaldi inspirábase na natureza. Algunhas das súas pezas máis famosas inclúen moitas melodías do mundo natural real interpretadas por violíns, frautas, etcétera.
• Pide ademais unha reserva de asento para ti e para os teus para un concerto natural. Iso si: recorda que nesta época do ano os campos non son tan musicais como na primavera. Os amenceres de maio, con todo, non chegas crer a diversidade de instrumentistas que contribúen ás bandas sonoras de moitas paisaxes.

Para observar a natureza e fotografala

• Pídeche uns prismáticos. Non é necesario que sexan os máis caros da tenda. Nin moito menos. Para empezar a observar aves ou bolboretas, por exemplo, abonda con que non che pesen moito, e que teñan entre oito e dez aumentos. Non menos. Tampouco máis.
• Outra boa idea é unha cámara de fotos. Canto máis zoom mellor. É a mellor substitución dunha rede cazabolboretas. E fundamental para retratar aves distantes. Unha vez máis, para empezar a utilizala non necesitarás unha das máis caras. Asesórate ben antes de decidirche polo modelo.
• Unha lupa. Non unha grande, tipo detective á antiga, senón máis ben pequena, pero moi potente. As contafíos, que se suxeitan cun dedo, son moi cómodas. Mellor que rolde os dez aumentos. Para observar pequenos invertebrados sen angustialos ou danalos sen querer están moi ben eses botes cuxa tapa é, precisamente, unha lupa.

 Para os animais es as plantas

• Se tes onde instalalos, pide para ese lugar caixas aniñadeiras e comedeiros para aves, coas súas instrucións de colocación, observación, limpeza, etcétera. Cun pouco de sorte faraste así cunha nova familia: a dos seres emplumados que os utilizarán.
• Os hoteis de insectos están cada vez máis de moda. Se tes un terreo nos que colocalo, pronto descubrirás cantos clientes chegan a aloxar. ¡E que diferentes! Hainos de moitos tipos e tamaños. Busca en Internet para elixir o que máis che guste.
• Únete a unha oenegué de conservación da natureza. Pode ser local, galega ou española. A nosa fauna e a flora necesitan que máis e máis humanos nos empeñemos en rescatalas das moitas ameazas que padecen. Para iso son necesarias as organizacións cidadás fortes, con suficiente apoio de persoas de todas as idades.
• Planta unha árbore. ¡Ou moitas! Os primeiros anos, está claro, dedicaranse sobre todo a crecer. Pero o tempo pasa rápido... En poucas décadas converteranse no fogar de infinidade de criaturas. ¿Que terá sido de ti para entón? Quen sabe... O que é seguro é que serás un dos mellores defensores que teña a natureza, ¿a que si?

---

---

---