A atleta monfortina do Valencia solicitoulle ao alcalde unha líña de subvencións para os deportistas individuais
19 abr 2017 . Actualizado a las 05:00 h.A atleta monfortina Saleta Fernández comeza esta fin de semana a tempada oficial das competicións ao aire libre. A xove promesa, que foi recibida a última hora do luns polo alcalde, José Tomé, como recoñecemento ao subcampionato de España absoluto que logrou en Salamanca, encara con ilusión e optimismo os vindeiros meses. Nesa recepción, a deportista local solicitou ao rexedor unha liña de axudas para deportistas que non están en clubes locais. Tomé confirmoulle que nos orzamentos destinarán uns 5.000 euros a este apartado.
-¿Como valora a recepción por parte do alcalde?
-Este tipo de actos sempre son positivos. Agradézolle a José Tomé este recoñecemento, e sobre todo que teña sensibilidade cara os deportistas que competimos no eido individual. Entendo que ata agora estabamos discriminados con respecto aos clubes, pero dende o luns xa sabemos que disporemos dunha axuda.
-¿Coida que son suficientes os 5.000 euros que irán destinados a esta partida?
-Non sei entre cantos deportistas repartirá esta cantidade. De todos os xeitos teño que dicir que o importante é que vaia comezando.
-¿Séntese valorada polas institucións?
-Sempre recibín moitas felicitacións de parte das institucións.
-Refírome ao tema das axudas.
-Da Deputación recibo, pero entendo que poderían destinar unha maior cuantía.
-¿Dáse conta do que conseguiu en Salamanca?
-A verdade é que si, porque cumprín un soño, compartir podio coa miña ídolo, Ruth Beitia, e ser subcampiona de España. Estou moi contenta de como comezou a tempada en pista cuberta, o que me motiva para ser aínda máis ambiciosa. Dá gusto ver como o traballo, o esforzo e o sacrificio que fas ten a súa recompensa. Estou moi ilusionada.
-Este sábado comeza a campaña ao aire libre.
-Si, comezo en Santander na liga cántabra, aínda que neste caso irei fóra de concurso. Se participo é para continuar collendo a forma para afrontar con garantías os vindeiros campionatos, que xa están á porta.
-¿Cales son os principais obxectivos dos vindeiros meses?
-O principal obxectivo é gañar o campionato de España, bater o récord absoluto galego, que está no meu poder, con 1,83 metros, e facelo ben no Europeo de Polonia no mes de xullo.
-¿Soña cos Xogos Olímpicos?
-[Sorrí] Para iso aínda quedan catro anos, e poden pasar moitas cousas. Recoñezo que a miña gran ilusión e competir nuns Xogos Olímpicos, porque considero que é o máximo ao que aspira calquera deportista. É verdade que nalgún intre soñei con iso, pero hai que ser realista e pensar que queda tempo e será complicado.
-Xa sabe que Ruth Beitia considéraa a vostede como a súa sucesora.
-Oxalá poida parecerme o máximo posible a ela algún día. Ruth é o meu espello, coa que madurei coma deportista e persoa. É un privilexio adestrar con ela.
-¿De que maneira está influíndo o seu adestrador, Ramón Torralbo, na súa carreira?
-Moito, porque todo o que estou saltando débollo a el. Está sendo fundamental na miña evolución.
-¿Como leva os seus estudios de márketing?
-Moi ben. Os deportistas temos que prepararnos, porque cando nos retiremos necesitaremos ter unha profesión.
-¿Acostúmase en Santander?
-Estou totalmente adaptada.
-¿Que mensaxe lle traslada aos afeccionados?
-Agradézolles o apoio que sempre me dan, e espero cumprir os obxectivos que todos esperan de min.