O tradicional ciclo festivo pecharase mañá co choro do pucho
08 feb 2016 . Actualizado a las 13:01 h.A parroquia chantadina de Santiago de Arriba celebrou onte o Domingo de Entroido, a penúltima xornada do ciclo festivo do Entroido Ribeirao. Seguindo a tradición, os volantes e peliqueiros saíron a danzar pola aldea a primeira hora da tarde en medio dun público numeroso. As súas actuacións alternáronse coa representación dos «oficios», unhas farsas improvisadas e sen diálogos.
O carnaval tradicional chantadino terminará mañá. O programa de actos da última xornada será similar ao de onte -comezará igualmente en torno ás catro da tarde-, pero rematará cunha cerimonia coñecida como «choro do pucho», que marca o final dos carnavais. Pucho é a denominación local dos espectaculares sombreiros adornados con fitas multicolores que levan os personaxes dos volantes nas súas danzas.