Investigadores da Politécnica traballan para poñer en valor a madeira autóctona para a maduración de viño e outras bebidas espirituosas
30 abr 2017 . Actualizado a las 05:00 h.A unión entre Galicia e Irlanda chega tamén a través da produción de whisky. A destilería Irish Distillers Inc, propietaria entre outras marcas, do whisky irlandés Jameson utiliza barricas feitas con carballos galegos para a maduración desta bebida espirituosa. E para certificar a madeira confiou no traballo de investigadores do campus lugués.
O emprego desta madeira para madurar bebidas como o viño non é algo novo; de feito, xa o facían os romanos. Pero o seu uso tivo altibaixos ao longo da historia e, dende logo, non contou co recoñecemento que si teñen outras madeiras como a de carballo americano ou francés. Así o explica Pablo Vila Lameiro, do grupo de investigación Enerxía, Mecanización e Modelización Agroforestal (EnerMecaModel) da Escola Politécnica Superior do Campus Terra e coordinador do proxecto de investigación que realizan coa destilería irlandesa.
O xerme desta colaboración xurdiu porque Jameson levaba tempo mercando barricas en Xerez (Andalucía), onde se envía madeira de carballo galego desde o serradoiro Maderbar, de Baralla. Os irlandeses interesáronse entón polas características da madeira galega e encargáronlle un estudo ao campus lugués. Déronse conta da calidade desta materia e agora os investigadores da Politécnica levan a cabo a certificación forestal das partidas de madeira de carballo galego coas que se elaboran integramente unhas barricas nas que madura o whisky Jameson. Isto garántelles unha correcta xestión medioambiental. Esta partida de bebida aínda tardará en saír ao mercado: «O mundo do viño é moi lento, pero o do whisky aínda máis, e estas partidas non chegarán ao mercado ata dentro de dúas décadas», explica Vila.
Prezo xusto para o dono do monte
No campus lucense levan máis dunha década estudando as propiedades físicas e mecánicas deste tipo de madeira, con proxectos nos que tamén participou, por exemplo, a adega Algueira, de Doade, ou o investigador da Politécnica Ignacio Díaz Maroto. «Desde hai dez anos traballamos para poñer en valor a utilización de madeira de carballo galego para caldos como os da Ribeira Sacra, Rías Baixas ou Rioja», explica Pablo Vila. «A trazabilidade era algo que ata agora non existía, e con que a barrica levase unha duela de carballo americano, era suficiente para que na etiqueta se mencionase, aínda que a maioría se elaborase con carballo galego, pero este non ten tanto prestixio», continúa. Así que esta investigación ten tamén connotacións de «orgullo» e de atraer recursos: «Xa que está demostrada a calidade desta madeira para as barricas, e xa que se usa, que se pague ao propietario do monte o que se ten que pagar e que sirva de apoio ao desenvolvemento rural galego», reclama o investigador lucense.
Os estudos revelaron que a madeira de carballo galego ten, polo menos, a mesma calidade que a do americano e o francés, pero, polo seu contido en taninos, que interaccionan co viño, apórtalle á bebida un aroma diferente, en definitiva, un atractivo e unha identidade especial.