Será este verán no Pazo de Feiras, con actividades para todos os públicos, e reunirá a 200 xogadores que buscan praza no mundial de Games Workshop
27 ene 2024 . Actualizado a las 05:00 h.Lugo (e Galicia) será por primeira vez a sede dun torneo internacional de wargames, é dicir, xogos de estratexia, un sector en auxe e que suma cada vez máis afeccionados na provincia. O evento, chamado La Voz Open, terá lugar este verán —o 31 de agosto e o 1 de setembro, no Pazo de Feiras e Congresos— e contará con actividades para todos os públicos, ademais das propias partidas do campionato, que será clasificatorio para o mundial de Games Workshop, o maior evento do sector. Uns 200 xogadores de todas as partes de España, Portugal e Andorra (a chamada «Ibericon») competirán por facerse cos últimos golden tickets ou prazas, que incluirán tamén o pago dos gastos de viaxe e aloxamento.
Que a cidade da Muralla acolla un evento desta magnitude, polo que puxaban grandes urbes da Península, débese ao traballo de Bandua Wargames. Esta empresa luguesa, consolidada a nivel internacional, conta na cidade cunha tenda de venda de miniaturas, xogos de mesa e wargames, ademais dunha marca propia enfocada a crear complementos e accesorios para estes xogos. La Voz de Horus —o maior podcast e blog en lingua castelá do sector e gañador dos premios iVoox do público— é o responsable de organizar estes torneos internacionais e confiou para iso en Bandua, desde onde están organizando e traballando para que Lugo se converta na capital dos xogos de estratexia.
Ademais das propias partidas do campionato, La Voz Open incluirá outros torneos e actividades paralelas abertas ao público en xeral, como exposicións, xogos ou obradoiros, entre eles, unha masterclass de inicio á pintura, a cargo de profesionais de prestixio internacional. A entrada ao evento será gratuíta, pero haberá actividades de pago.
A relevancia deste evento tradúcese tanto en termos económicos, como en promoción turística da cidade e do propio universo dos wargames. Ademais dos 200 xogadores e as súas familias ou amigos que os acompañen, agárdase que cheguen á cidade nesas datas centos de persoas afeccionadas aos xogos de miniaturas, de estratexia ou de mesa. Iso implica máis demanda nos establecementos hoteleiros, na restauración, nos comercios... De feito, a propia empresa Bandua estase encargando de elaborar unha guía turística para promocionar Lugo e a provincia, paliando así a falta de apoio das institucións públicas e as malas comunicacións que sofre a cidade: «Conseguimos descontos para que os participantes poidan alugar coches, estamos recompilando lugares de interese para propoñer visitas, actividades que poder facer na zona, información práctica para moverse... e facémolo por respecto aos nosos clientes», apunta Pablo Rouco, xerente de Bandua.
As partidas vanse retransmitir en liña, polo que o evento vai ter un seguimento internacional moi forte. «Moita xente do estranxeiro vai poñer no mapa por primeira vez a Lugo e mesmo a Galicia, e iso terá un impacto económico moi positivo», continúa Rouco.
Unha oferta de ocio alternativo, analóxico e transversal en xénero e idade
Os xogos de estratexia, lonxe de ser bélicos ou violentos, como podería facer pensar a denominación de wargames, son, ante todo, sociais, segundo defende Pablo Rouco: «Somos analóxicos, aínda que haxa comunidades e foros enormes sobre o tema en Internet, pero para xogar precísanse varios xogadores e estar de xeito presencial». Estes xogos de batallas van máis aló dun xogo de mesa. Por un lado, está a parte previa de preparación —pintado e montaxe do material, exércitos... posto que o taboleiro non sempre é o mesmo—, que se pode facer de xeito individual, e despois está a partida en si, que precisa de varios xogadores. E aquí o perfil é moi amplo. «Esta é unha oferta de ocio alternativo, transversal en xénero e idade, e que conta cada vez con máis afeccionados», continúa Rouco.
Organización
A empresa británica Games Workshop, especializada en xogos de miniaturas e unha das maiores empresas do mundo no campo, é a encargada de organizar o mundial de xogos de estratexia, o maior evento do sector. En Lugo repartiranse catro golden tickets para a final, converténdose así na cita europea que máis prazas concede nun evento simultáneo: un golden ticket polo xogo de sci fi de exércitos Warhammer 40.000; outro polo de fantasía heroica de exércitos Age of Sigmar; un polo de taboleiro de tema fantástico Warhammer Underworld; e outro para quen teña máis puntos no circuíto dos tres grandes eventos.