Din que en Alemaña respiraron tranquilizados ao comprobar que o autor da matanza do centro comercial de Múnich non tiña relación cos terroristas do Estado Islámico. Pero a tranquilidade durou pouco porque enseguida saíu á luz o motivo que levou a cometer unha matanza a un mozo tímido, que os veciños consideraban bo rapaz, que axudaba ao seu pai no traballo e que as fins de semana repartía periódicos para gañarse algún diñeiro.
Durante sete anos, ese rapaz sufriu acoso escolar, foi obxecto de insultos e humillacións que todos os seus compañeiros coñecían e que ninguén soubo ou quixo remediar. Segundo contou unha compañeira, el aguantaba en silencio, pero un día enfrontouse aos acosadores e díxolles: «Ides decatarvos todos. Un día levarei a cabo unha matanza». E así foi. Cantas mortes causou xa o acoso escolar? Ata agora, as vítimas suicidábanse, pero Aly Somboli é o primeiro que non quixo morrer só. Empuxouno o desexo de vinganza contra os seus acosadores, sen dúbida, pero a súa acción é unha chamada de atención a unha sociedade que non sabe protexer aos seus nenos e os seus adolescentes dun sufrimento sen sentido, profundamente inxusto e que se alonga durante anos sen que ninguén lle poña remedio.
Será necesario que todos, sen excepción, contribuamos a loitar contra o acoso escolar, ese cancro do sistema educativo.