A subida do prezo de alimentos de primeira necesidade é un feito difícil de ocultar, pero algúns establecementos e empresas case o lograron.
Un matrimonio amigo come, nun restaurante próximo, guiso de patacas e carne todos os xoves, o mesmo día que eu como peixe. Non nos subiron os prezos, pero dannos menos comida polo mesmo diñeiro. A eles deixábanlles na mesa unha sopeira da que podían servirse a pracer. Agora a sopeira só contén o xusto para encher un prato. O meu peixe enchía por completo unha fonte; agora tamén, pero o tamaño da fonte e do peixe é tres veces menor. A mesma redución prodúcese en produtos que se venden en tubo, como os dentífricos, que conteñen un trinta por cento menos da cantidade de produto que antes contiñan.
A fraude máis preocupante é o da compra de votos por correo que non deixa de aumentar. Descubriuse en lugares onde se fixo dunha forma tan chafalleira que chamou a atención da policía, pero a sospeita de que existen multitude de casos máis sutís pon en cuestión a credibilidade dos resultados das eleccións do 28 de maio. Poida que os nosos votos sexan manipulados e que beneficien a persoas ou grupos que non son os que nós desexamos que gobernen. E isto é o peor que pode pasarnos como sociedade porque é o afundimento da democracia.
En fin, é posible que o noso sistema electoral non sexa tan garantista como sempre se nos dixo, pero creo que o peor sería absterse. A miña intención é acudir ás urnas coa esperanza de que o meu voto represéntame a min, á miña vontade de vivir nun país libre e democrático.