Ourense, esa cidade que mira máis ao esplendor perdido e ao título «nobiliario» da Atenas de Galicia que aos retos do século XXI, reclama o seu lugar nas celebracións das Letras Galegas 2017. Como lembrou na presentación da mostra «Os mundos de Carlos Casares» un dos fillos do protagonista, Håkan Casares, Ourense era cita obrigada para o escritor, o espazo onde disfrutaba e ao que anceiaba volver sempre. Aproveitaba as viaxes á cidade, e as visitas familiares, para ir ás tertulias do Liceo a compartir as horas de conversa. Unhas sesións demoradas nas que o autor de «Ilustrísima», como lembraba o seu fillo, gostaba tanto ou máis de escoitar aos seus amigos e contertulios que de falar.
Ao Centro Valente voltan agora os mundos casarianos convivindo en maletas e caixas de madeira que amosan a un Casares que sempre aporta novidades. Algúns dos materiais xa son coñecidos, e formaron parte de mostras como as que se fixeron en Xinzo hai anos, e os comisarios do proxecto que se inaugurou na cidade, Chus Martínez e Gustavo Garrido, apostaron desta volta por ampliar as propostas con documentación inédita, antigas gravacións e entrevistas ao propio escritor, reflexións dos autores actuais sobre a súa figura e a súa obra e eses elementos que -como lembrou o seu fillo- formaban parte da vida cotidiá da casa familiar aínda que non se reparase no significado dos mesmos.
Da man da fundación que mantén viva a súa memoria, Ourense vai ter o privilexio de achegarse a coñecer e disfrutar o universo de Carlos Casares. Un mundo con moitas e venturosas sorpresas.