Non é moi frecuente que os xornais recollan como noticia actividades de teatro nos colexios. Destácano soamente cando se converte en escena pública, o cal supón para os profesores un traballo extra que vai máis aló dos obxectivos escolares na aula. Así figura na historia do teatro en Galicia presentada no Instituto Nacional de Tecnologías Educativas y de Formación del Profesorado (Intef), do Ministerio de Educación, Cultura y Deporte, que resumimos nos recursos (REC) de cada noticia, a ver se nos anima a plantar escenarios abertos na escola.
29 mar 2017 . Actualizado a las 05:00 h.Marzo, un mes moi teatral en Vilalba
Este marzo recentemente iniciado será un mes moi teatral en Vilalba. Ten moito que ver niso a Escola de Teatro, que celebra os seus dez anos de existencia e organiza unha nova edición da Mostra de Teatro. Unha exposición de fotos, carteis e atrezzos recordará os traballos realizados ata agora, co engadido de actuacións musicais e dalgunha sorpresa. O sábado 11 empezou a Mostra de Teatro, que alcanza xa as 18 edicións (La Voz, 2/3/2017).
REC: En Galicia, anos 70: teatro con grupos como O Facho, Teatro Circo de Máscaras, Teatro Popular Keyzán, Histrión 70, Teatro da Rúa, Pepa Loba, Antroido, Artello, Mari-Gaila, Troula...
O teatro como medio para o desenvolvemento social e cognitivo
É o obxectivo do programa CaixaEscena, unha iniciativa da Obra Social ‘la Caixa’ dirixida a profesores e educadores que recoñecen a actividade escénica como unha ferramenta moi valiosa para o desenvolvemento integral dos alumnos. A experiencia levou a cabo o pasado fin de semana en Vigo, na Escola Superior de Arte Dramática de Galicia, nunha convocatoria que uniu a 90 estudantes e profesores de seis centros educativos de Galicia (La Voz 23/2/2017).
REC: En 1973 nace a Mostra de Teatro Galego de Ribadavia, impulsada pola xeración Abrente, que creou o marco de desenvolvemento do teatro galego contemporáneo: entre 1973 e 1980.
Educa Teatro pon en escena a maxia do mundo de Pinocchio
O mundo máxico de Pinocchio é o espectáculo máis evolucionado de Educa Teatro. Mantén a esencia da compañía pero engade, por exemplo, a presenza dun piano, xogos coas sombras e varios números de ilusionismo. Sobre o escenario estarán Pepiño Griño, a fada Mimadriña, o raposo e o gato, que acompañarán a Pinocchio no seu camiño ata converterse nun neno de verdade. Un camiño que comeza no taller de Geppetto e que pasará pola escola, por un circo de marionetas ou pola barriga dun peixe xigante (La Voz, 8/2/2017).
REC: Tras catro anos de peche, a mostra volveu renacer en 1984 por impulso da Xunta de Galicia como I Festival Internacional de Teatro, e continúa o sentido histórico que Ribadavia tiña para o teatro galego contemporáneo.
Teatro en inglés contra o acoso escolar
Uns 850 estudantes gozan dunha obra coa que aprenden idiomas e valores como o respecto ao próximo. Esta é a intención de Freaky, peza que onte se representou na o auditorio de Afundación ante un nutrido grupo de alumnos. A obra, levada a escena integramente en inglés por tres actores, conta a historia dun neno ao que lle custa integrarse nun campamento de verán, pero ao que os seus dotes como bailarín lle farán despuntar sobre os seus compañeiros. Esta actividade serviulles tamén para tratar o tema do acoso cos alumnos (La Voz, 10/1/2017).
REC: En1984 nace o Centro Dramático Galego, integrando unha parte dos profesionais teatrais de varias compañías galegas: Mari-Gaila, Artello, Antroido, Trecola... Nace como teatro institucional e escola dramática.
Teatro escolar no século XVII
O estudo Teatro e espectáculos públicos en Galicia, de Julio I. González Montañés, dedica un apartado a como a orde xesuíta, orientada cara ao ensino e a formación, «adoptou o teatro escolar e introduciuno nos seus colexios cunha tripla finalidade: didáctica, moralizante e propagandística. O conde de Monterrei funda e dota un colexio da orde na súa vila natal en 1555, o primeiro dos cinco que tiveron os xesuítas en terras galegas». Algunhas representacións duraban «case seis horas [...] sen ningún cansazo do auditorio» e tivéronse tamén «outros diálogos compostos polos mesmos alumnos». Entremeses sobre a pesca no río Miño, o entremés de correr o anel, da temperanza do viño, do portugués, do tempo, a razón, a xustiza, dos personaxes mitolóxicos, representados polos alumnos gramáticos con diálogos de moito entretemento e gusto «aos que asistían os pais, familiares e autoridades»
REC: Teatro e espectáculos públicos en Galicia: www.teatroengalicia.es/presentacion.htm