Os sindicatos recordan ao Porto que o xuíz dictou que haxa poxa por Vulcano e que o Consello de Estado só é asesor

O Consello de Estado rematou por dar a razón ás pretensións do presidente da Autoridade Portuaria de Vigo, Enrique César López Veiga. Dende que Vulcano liquidou, o político popular apostou por non buscar un novo concesionario para os terreos da histórica factoría, xa que prefería que houbese espazo para máis contedores en Guixar. López Veiga puxo sobre a mesa as dúbidas xurídicas que lle xeraba a operación, pois, dicía, a concesión quedara extinguida no momento en que Vulcano foi á liquidación. O presidente portuario gañou tempo pedindo un informe ao Consello de Estado. Este organismo consultivo acaba de emitir un ditame que dá a razón ao Porto no sentido de que a concesión de Vulcano non se pode transferir a un terceiro.

Claro que este dictame non ten un carácter executivo e chega cando o xulgado fallou que si se pode buscar un novo concesionario para Vulcano. E chega, tamén, nun momento en que a concesión saíu a poxa pública e o grupo Argos, do empresario Alberto Barreras -antigo socio en Vulcano- xa presentou unha oferta, que negocia co administrador concursal para obter a concesión dos terreos e continuar co estaleiro.

Os sindicatos recordaron onte que o ditame do Consello de Estado «nin modifica nin altera a resolución xudicial xa ditada» e que esta xa se converteu «en firme e sen opción de recurso», en palabras de Comisións Obreiras. CC.OO. recorda que López Veiga xa dixera que cando unha sentenza é firme non cabe outra opción que acatala. O sindicato cre que o presidente portuario pretende xerar inestabilidade para provocar medo nos posibles inversores. Comisións cre que López Veiga protagoniza unha «insistencia inxustificada» que obedece a «intereses persoais espurios contrarios aos da industria e do propio porto», polo que pide á Xunta que o substitúa no cargo.

A CIG tamén insiste en que un ditame consultivo do Consello de Estado non ten «ningún tipo de efecto vinculante» e que no fondo todo se trata dunha cuestión de vontade política. «O que demandamos tanto de Madrid como da Xunta de Galicia é que deixen de pór atrancos e cooperen para crear as condicións que permitan retomar a actividade produtiva e recuperar os postos de traballo en Vulcano», di este sindicato. Pide á Autoridade Portuaria de Vigo que remate coa súa ofensiva xudicial para extinguir a concesión de Vulcano e non faga inviable algunha solución que permita continuar coa actividade de construción naval no estaleiro.

O ditame do Consello de Estado fíxose esperar, porque en realidade pasou por unha longa peregrinación burocrática. Aínda que López Veiga asegurou ao consello de administración do Porto en decembro que solicitaría a opinión deste órgano, en realidade tivo que pedila a Portos do Estado, para que a solicitase ao Ministerio de Mobilidade e Transportes, para que a pedise ao Consello de Obras Públicas e para que finalmente fose ao Consello de Estado. E todo iso para ter unha opinión non vinculante.

Mentres, no consello de administración do Porto de Vigo, as dúbidas en torno ao futuro de Vulcano son evidentes. López Veiga non conta con respaldo absoluto, se ben non hai unha oposición forte. Pero incluso a Xunta dixo que dá prioridade á continuidade dun proxecto naval na antiga fábrica de Teis, sempre que exista un inversor. Vicalsa manifestou o seu interese e mandou unha proposta ao Porto no mes de outubro, que López Veiga desbotou. Agora, a caldeireira non se presentou á poxa, pero si o fixo Alberto Barreras, que está negociando un plan de pagos co administrador concursal.

---

---

---