«Vivimos un tempo que deixou de amar os libros e que aplaude a vulgaridade»

Ramón Loureiro Calvo
ramón Loureiro REDACCIÓN / LA VOZ

AROUSA

MARTINA MISER

Vive en Vilagarcía e advirte de que «o mal uso de Internet estalle facendo moitísimo dano a toda a sociedade»

15 sep 2019 . Actualizado a las 05:00 h.

Luis Alonso Girgado (Ferrol, 1946) é unha figura fundamental da cultura galega contemporánea. Un verdadeiro intelectual, que alza a súa voz en defensa do ben común e da liberdade. Ao seu labor como investigador no Centro Ramón Piñeiro, que fixo posible a recuperación facsimilar de publicacións tan emblemáticas como a revista Aturuxo, únese o seu traballo, como editor, á fronte de Follas Novas, ademais do seu carácter de verdadeira ponte entre Galicia e todas as grandes literaturas da outra beira do Atlántico. O día 20, no propio Centro Ramón Piñeiro, en Santiago de Compostela, a cultura galega vaille render homenaxe por unha vida enteira dedicada ao coñecemento, á reflexión intelectual, á docencia e aos libros. A eses libros que, desde este Vello Reino de Occidente, fan que o mundo sexa mellor: os libros de Rosalía, os de Castelao, os de Ánxel Fole...

-¿A cultura está perdendo espazo neste tempo?

-Evidentemente, e por desgraza, así é. Vivimos un tempo que deixou de amar os libros e que aplaude a vulgaridade. O que pasa, por exemplo, coa boa literatura, é terrible, pero non é un fenómeno illado. E digo que non é un fenómeno illado porque non hai máis que ver que clase de políticos temos hoxe para saber en que dirección camiña a nosa sociedade. Abonda con comparar o que acontece agora co que pasaba non hai tantos anos. Isto é para estar moi preocupado.

-Os grandes escritores, e sobre todo os clásicos, están comezando a ser pouco menos que invisibles. Algo que antes parecía impensable.

-¿Impensable...? Non, a min nunca me pareceu impensable. É máis: isto víase vir, e ten moito que ver co abandono, en tantos aspectos, da educación, que foi indo a peor constantemente. Un verdadeiro desastre, porque un país que deixa de prestarlle á educación a atención que merece acaba tendo problemas moi graves. O sistema educativo é fundamental, porque é a columna vertebral dun país. Nas aulas é onde se aprende a aprezar as cousas verdadeiramente importantes. Eu, a estas alturas, xa estou convencido de que hai xente á que lle interesa que teñamos un sistema educativo cada vez peor.

-¿Por que?

-Porque hai moitos sectores aos que lles vén estupendamente que teñamos cidadáns cada vez máis manipulables. A educación está experimentando un constante retroceso, e non podemos seguir pensando que iso é algo casual. O mal uso de Internet estalle facendo moitísimo dano a toda a sociedade. A Rede debería servir para espallar o coñecemento, non para fomentar a zafiedade.

-¿Por que hai cada vez menos lectores de literatura?

-Porque no Bacharelato, que é onde de verdade se forman os lectores, xa non hai un programa de lecturas serio. Unha pena. É triste, e sobre todo moi grave.