As actuacións das celebracións repártense en distintos puntos de Cambados
30 jul 2025 . Actualizado a las 05:00 h.A Festa do Albariño da comezo hoxe, nunha xornada animada e calorosa. Á unha do mediodía José Manuel Domínguez, coñecido polos veciños como Domin, iniciará as celebracións co seu pregón. A continuación, o paseo da Calzada abrirá as súas portas e comezará a recibir aos que máis ganas teñan de degustar algunhas das propostas dos 42 postos que se poden encontrar ao longo da arboleda.
Pola tarde Fussion & MB Flow serán os encargados de animar a praza de San Gregorio nunha actuación que comeza ás 17.30 e que está organizada polos hostaleiros da zona. Ás sete da tarde a batucada Olodum do Coio fará un pasarrúas pola vila e ás oito collerá o relevo o espectáculo na rúa para os máis pequenos: Séquito do Capitán Nemo, cun paseo dende a praza do Concello ata Fefiñáns. A noite rematará na praza do concello coa actuación do grupo Claxxon ás once da noite.
Mañá Treixadura será o grupo protagonista na praza de Fefiñáns, nun día no que se celebra a Cata Prima no salón de actos do Parador de Cambados e no que se inaugura o Túnel Profesional do Viño.