Sospeitan que o proceso foi deseñado especificamente para contratar a esta persoa, quen ademais estaría desatendendo as tarefas para as que foi empregada
11 oct 2025 . Actualizado a las 05:00 h.O grupo municipal do BNG no Concello de Valga lanzou onte unhas graves acusacións dirixidas ao equipo liderado polo alcalde popular José María Bello Maneiro.
En maio do presente 2025, o Concello asinou coa Consellería de Política Social e Igualdade da Xunta un convenio de colaboración valorado en 30.000 euros para a realización de actividades do proxecto de envellecemento activo.
Segundo o grupo encabezado por Fran Devesa, o goberno local tería destinado o importe desta axuda a creación dun posto de técnico de coordinación de actividades de envellecemento activo, cuxas bases, alegan, serían deseñadas a medida para concederllo a filla da segunda tenente de alcalde e edil de Emprego, Carmen Gómez Pardal.
Antes da celebración do proceso selectivo, o BNG xa presentou recursos co apoio de entidades como o Colexio Oficial de Traballo Social de Galicia, sinalando numerosas irregularidades.
Coa praza xa concedida, os nacionalistas denuncian que esta persoa «está realizando labores que non teñen nada que ver co envellecemento activo, como tramitación de expedientes ou licitacións de obras».
Aseguran, ademais, que o Concello de Valga comezará a cobrar este ano as actividades do envellecemento activo, circunstancia inédita no municipio ata este ano e que, segundo o partido liderado por Devesa, sería outro indicio do desfalco.
O BNG indica que levará ao Parlamento de Galicia a situación, co obxectivo de que se estude unha posible xestión fraudulenta da subvención concedida.