Ádega proxectará «Soy Nevenka» co gallo do Día contra a Violencia Machista
AROUSA
Memorias dun caracol, Anselm e Kneecap completarán a programación do que queda de ano
13 nov 2025 . Actualizado a las 21:50 h.O cineclub Ádega vén de facer pública a súa programación para o que resta do ano 2025, que inclúe unha xornada, o día 21 de novembro, de colaboración co Centro de Información da Muller (CIM) co gallo do Día contra a Violencia Machista. Proxectarán o filme Soy Nevenka, da directora Icíar Bollaín, no que se relata un dos casos de misoxinia colectiva máis sangrantes da historia recente de España.
Antes, o venres 14, será a quenda de Memorias dun caracol, do australiano Adam Elliott, unha peza de animación para adultos feita con plastilina e stop-motion con toques de comedia negra. Xa en decembro, o día 12, pasarán o documental Anselm, de Wim Wenders, que versa sobre a obra do artista alemán Anselm Kiefer. Finalmente, o 19 pecharase o ano con Kneecap, un filme de Rich Peppiatt, protagonizado polos integrantes da banda norirlandesa que colmou portadas no último ano polo seu apoio a Palestina.
Tódalas proxeccións terán lugar no salón García e comezarán ás oito e media da tarde. A entrada será de balde para os socios, valerá 2,50 euros para os desempregados e menores de 30 anos e 4 euros para o resto do público, salvo no caso de Soy Nevenka, que será de balde para todo o mundo ata completar aforo.