Segunda vitoria consecutiva na casa do Asmubal, que ascende un posto na táboa
AROUSA
As de Juan Manuel Costas impuxéronse ao Hand Vall Valladolid 31-27
18 nov 2025 . Actualizado a las 05:00 h.O Inelsa Solar Asmubal Meaño encara as últimas semanas do 2025 recibindo no seu feudo de Coirón o groso dos seus, hoxe por hoxe, rivais directos pola permanencia na División Honor Plata Femenina. E ata agora, está demostrando saber aproveitar o calendario. Tras derrotar 28-19 o Cavidel Aula Valladolid o pasado día 1, o último sábado o conxunto que dirixe Juan Manuel Costas dobregou o Hand Vall Valladolid, 31-27, sumando o seu segundo triunfo da tempada para acadar os 5 puntos e ascender deste xeito do undécimo ao décimo posto da clasificación provisional.
A progresiva melloría en defensa amosada nas últimas xornadas polo Asmubal Meaño levou o Hand Vall Valladolid a ir a remolque practicamente desde o inicio do encontro. O cadro local chegou a dispoñer dunha máxima renda de seis tantos na primeira parte, consolidando o seu dominio reducindo as perdas de balón que tantos disgustos lle custaron no primeiro mes de campionato e impedíndolle ao seu rival achegarse a menos de tres goles de desvantaxe.
Laura Miniño, a lanzadora de sete metros do equipo, liderou o capítulo goleador do Asmubal Meaño con dez tantos. Este sábado tocará xogar na cancha do Porriño B, rival só 1 punto por riba.
FICHA DO PARTIDO:
INELSA SOLAR ASMUBAL MEAÑO (31): Irene Ríos, Raquel Sineiro, Arangio (3), Currás (3), Damascena (4), Ballada (2), Claudia Vera (4), Alba Domínguez, Uxía, Laura Miniño (10), Irene Romero, Luna, Raquel Muñiz (1), Vanesa (2) e Shaila (2).
HAND VALL VALLADOLID (27): Guayo, Díez (2), Taboada (4), Hernández (1), Luelmo (4), Silvia Pérez (3), Gil, García (3), Sofía Pérez (5), Valderrama (4), Zamora, Fernández (1) e Delgado.
MARCADOR CADA CINCO MINUTOS: 2-2, 6-4, 7-5, 10-7, 13-8, 16-12 (descanso); 18-15, 21-18, 24-19, 25-21, 28-23 e 31-27.
ÁRBITROS E EXCLUSIÓNS: Villanueva e Valdés. Dous minutos a Arangio (min 12.59) e as visitantes Silvia Pérez (16.20), Sofía Pérez (47.01), Delgado (47.14), Taboada (52.05) e Gil (59.35).