Sete pontevedreses buscarán esta semana a gloria no Campionato de Europa de piragüismo esprint
AROUSA
Jácome, García, Crespo, Fontán, Duro, Graña e Germade optan a podio
08 jun 2026 . Actualizado a las 05:00 h.A elite do piragüismo continental cítase esta semana no Campionato de Europa de Esprint. No centro de alto rendemento da localidade portuguesa de Montemor-O-Velho, padexeiros de 39 países completarán 131 regatas nos catro días de competición, motivados polo cambio de sistema de clasificación para a vindeira edición dos Xogos Olímpicos, os do ano 2028 en Los Ángeles, que fai desde este ano as copas do mundo e os campionatos continentais puntuables para un reparto das prazas olímpicas que antes se dirimían entre o último Mundial previo á maior cita deportiva do planeta e un Preolímpico a modo de repesca.
A selección española acode pois a Montemor-O-Velho cos seus primeiros espadas, coa única excepción do C2 500 masculino, no que o bo facer do vilanovés Manuel Fontán e o madrileño Diego Domínguez nas dúas primeiras copas do mundo déronlles o billete continental evitando o dobrete do poiense Adrián Sieiro e o madrileño Daniel Grijalba, o C2 500 que padexará no Mundial deste ano.
Ademais de Fontán, Pontevedra conta con outra media ducia de piragüistas no Campionato de Europa. Catro deles, da capital de provincia, incluídos os seus tres deportistas nos últimos Xogos Olímpicos, os de París 2024: Antía Jácome, montada no C1 200, Pablo Crespo, no C1 1.000, e Carolina García, a metade dun K2 500 que completa a ceutí Nerea García. Jaime Duro, figura emerxente no panorama internacional do medio fondo, fará o C1 5.000, proba na que é vixente subcampión do mundo. E xunto aos anteriores, dous cangueses: Pablo Graña, defensor do título no C1 200, e Rodrigo Germade, medallista nas dúas últimas edicións dos Xogos Olímpicos no K4 500 no que volverá compartir asento co betanceiro Carlos Arévalo e co balear Marcus Cooper, tentando empezar a facer funcionar un barco vido a menos tras a saída voluntaria de Saúl Craviotto, co madrileño Adrián del Río como relevo.
Programa das probas
O Europeo arrincará este xoves coas series dos barcos individuais sobre 200, 500 e 1.000 metros, os C2 e K2 500 e os K4 500. Co venres reservado para a disputa das semifinais, o sábado viviránse a metade das regatas polas medallas, incluídas as do C1 1.000 á que aspira Pablo Crespo, C1 200 (Antía Jácome e Pablo Graña), K4 500 (Rodrigo Germade) e a final directa do C4 Mixto, na que España presenta un bote tripulado por Jácome, Fontán, a murciana Viktoria Yarchevska e o madrileño Diego Domínguez.
O domingo, ademais da final directa do C1 5.000 con Jaime Duro, o piragüismo pontevedrés podería contar na liña de saída polas medallas co C2 500 de Manuel Fontán e co K2 500 de Carolina García. Os tres, como os outros catro padexeiros da provincia, parten entre os candidatos ao podio dos seus respectivos barcos.