O Concello de Catoira renovará parte do sistema de bombeo da estación depuradora
CATOIRA
A adquisición das pezas, valoradas en máis de 26.000 euros, costeouse mediante fondos provinciais
21 nov 2025 . Actualizado a las 05:00 h.A estación depuradora de Catoira sufrirá nos próximos días un lavado de cara. O Concello repoñerá varias das pezas do sistema: dúas bombas, unha motobomba para o bombeo de lamas e as lámpadas de desinfección ultravioleta. Unha renovación das instalacións que foi prevista no mes de marzo e que suporá un custe duns 26.400 euros, sufragados na súa totalidade mediante fondos do plan +Provincia da deputación provincial.
O alcalde do municipio, o nacionalista Xoán Castaño, apunta que as habituais tarefas de mantemento e reparación dunha planta que funciona dende o ano 2009 non serán abondo desta volta, e que xa vén sendo necesaria a substitución de varios dos elemento centrais da súa estrutura. Contan con recibir en breves as novas pezas, momento no que comezarán as obras de instalación. «O saneamento é un servizo fundamental que ten que estar ao día. Gastar os cartos nesta mellora era unha obriga pola eficiencia na infraestrutura para que as augas residuais se traten correctamente antes de saír ao mar», indicou o rexedor.
Na depuradora de Catoira desemboca a totalidade da rede de saneamento do municipio e está deseñada para dar servizo a uns 5.000 habitantes. Conta cunha capacidade hidráulica de 1.700 metros cúbicos ao día de media e cun máximo de caudal de 142 metros cúbicos á hora.