Roi Casal gravará no auditorio de Vilagarcía e no Gran Teatro da Habana a versión en directo de «Son Galego, Son Cubano»

As entradas para o concerto, que se desenvolverá o sábado, 9 de marzo, xa están á venda e serán gratuítas para os meniños menores de tres anos


Vilagarcía / La Voz

Que o Himno Galego se estrease no seu día na Habana di moito dos fondos vencellos que unen a Galicia con Cuba, tamén no eido musical. No 2016, Roi Casal teceu un nó aínda máis forte ao estrear, no Gran Teatro da Habana, o seu disco Son Galego, Son Cubano. Foron dúas noites irrepetibles ás que só se lles puido poñer un pero. Xosé Neira Vilas, autor das letras, o lendario autor de Memorias dun neno labrego, finaba sen poder ver reflectido sobre un escenario o froito do seu traballo conxunto con Roi. Logo dunha prolongada xira que xa recalara na capital arousá hai dous anos, Vilagarcía volve aliarse coa ponte musical entre galegos e cubanos ao servir o seu auditorio como un dos dous recintos nos que a banda, formada por músicos das dúas beiras do Atlántico, gravará en directo a experiencia Son Galego, Son Cubano. O outro será, de novo, o Gran Teatro da Habana que, na visión do arpista catoirense, simboliza coma ningunha outra obra a influenza e a poderosa raizame que os galegos chegaron a acadar na illa caribeña.

A sesión vilagarcía vaise gravar o sábado, 9 de marzo, ás 21 horas. Roi Casal asegura sentirse moi cómodo en Vilagarcía, practicamente na casa. O auditorio, por outra banda, ofrece as condicións técnicas acaídas para levar a bo porto un proxecto desta envergadura. «O disco sairá logo do verán, e os concertos de Vilagarcía e A Habana serán a súa parte nuclear», explicou o músico, que vén de presentar o concerto xunta a concelleira de Cultura, a socialista Sonia Outón. «Vai ser un concerto moi especial no que incorporaremos unha sección de baile», promete Roi. As entradas poden mercarse xa a través do portal ticketea.es e costarán 12 euros para os adultos, en calquera das tres zonas de butacas, e 6 para os rapaces de tres a doce anos. Os meniños menores desa idade entrarán de balde, se ben será preciso retirar unha invitación previamente.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Roi Casal gravará no auditorio de Vilagarcía e no Gran Teatro da Habana a versión en directo de «Son Galego, Son Cubano»