Programan unha segunda sesión en Vilagarcía do «Amoriños» de Touriñán e Perdomo ao esgotarse as entradas para a primeira

Amoriños, o novo monólogo que reúne no mesmo escenario a dous xigantes do humor galaico coma Touriñán e David Perdomo, vén de esgotar as 754 entradas para o seu paso polo Auditorio de Vilagarcía o 13 de decembro. Visto o éxito da proposta, Concello e promotora do espectáculo acordaron programar unha segunda sesión, que en estrito sentido temporal resultará a primeira, por canto o seu horario de inicio, as 18.30 horas, precederá a sesión con todo vendido das 21 horas dese mesmo día. 

A sociedade Touriñán-Perdomo xa comprobou con anterioridade o seu gran tirón en Vilagarcía cos seus anteriores espectáculos Corentena e Corentena-Game Over. Os prezos das entradas van dos 16 aos 22 euros e están xa dispoñibles en ataquilla.com.

---

---

---