Bares de Boiro participan no festival Pint of Science, unhas charlas que se celebran simultaneamente en 27 países para achegar a ciencia á poboación
20 may 2026 . Actualizado a las 05:00 h.Se hai un negocio abundante en Boiro ese é o da hostalería. Polo tanto, é boa idea escoller estes establecementos para achegarse ao público, e máxime cando o que se pretende é divulgar algo que non está ao alcance de calquera, neste caso, a ciencia. Pode chocar cando a un lle contan que nun bar asistiu a dúas conferencias científicas, e máis aínda cando lle engaden que en Boiro non foi un día só, senón tres e en senllos locais de moda, promovidos por unha organización internacional, a complicidade dos propietarios e a comunidade científica.
Xa o dicía a canción de Gabinete Caligari que os bares son «lugares tan gratos para conversar», e no Guilligams desembarcou o festival Pint of Science o luns, na que foi a primeira parada dunha tripla cita que tiña continuidade onte na Terraza do Furancho, e remata este mércores no pub restaurante Ginlab. O que sucedía en Boiro tiña (e ten) réplica en outras 113 cidades españolas, pero tamén en 27 países de cinco continentes, o que se encargou de explicar a boirense Noa Caramés, profesora da Universidade de Vigo, e responsable da dirección da cita.
En primeiro lugar informou aos numerosos asistentes de que Pint of Science é un festival de divulgación científica que se celebra en bares e que nesta edición sumará, dende o luns e ata hoxe, unhas 1.300 charlas en España.
No Guilligams interviñeron Felipe González Outeiriño, da Universidade de Santiago; e Isabel Rebollido Vázquez, da Axencia Espacial Europea. O primeiro falou das especies vexetais invasoras, centrándose na Tradescantia fluminensis que abonda nas ribeiras dos ríos; e a científica boirense desenvolveu a conferencia Da orixe da auga e porqué 3I/ATLAS é unha pedra.
Chegada e expansión
Felipe González explicou como chegou á Península a Tradescantia fluminensis, tamén coñecida como «amor de home» e «orella de gato», procedente de Sudamérica. Detallou os problemas que está a crear, xa que é moi abundante e espesa, especialmente no desenvolvemento doutras plantas autóctonas, pois reduce a chegada da luz solar e elimina a flora local. Ademais, enumerou os métodos máis adecuados para acabar con ela, e deixou constancia do pouco ou nulo compromiso da Administración para loitar contra unha especie que se estende por toda España.
A continuación, desenvolveuse un concurso tipo Trivial para pulsar os coñecementos científicos do público, antes de que Isabel Rebollido se puxera á fronte do acto para desenvolver unha non menos interesante charla sobre a orixe da Terra, aparellada á orixe da humanidade.
Rebollido fixo un percorrido pola formación do planeta hai 4.543 millóns de anos e a aparición do primeiro vestixio de vida. Falou de como foi clave o que se chama bombardeo intensivo tardío, que consistiu na colisión de numerosos meteoritos e corpos contra planetas e satélites do sistema solar, e que deron lugar, por exemplo, aos cráteres que se poden ver na superficie lunar. A consecuencia dese cataclismo, apareceron elementos fundamentais na Terra, como a auga.
A científica desmontou mitos, como o do 3I/ATLAS, que é un cometa interestelar e que en redes se estendeu que era unha nave e resultou ser unha pedra. Tamén explicou por que Plutón deixou de ser planeta, xa que incumpre condicións para selo, e que se fose un planeta, habería que cualificar igual centos semellantes que orbitan no sistema solar. A enxeñeira astrofísica atribuíu a consideración de planeta a que foi descuberto por un americano.
A primeira parada do Pint of Science xuntou moito público que entre ruídos de bar, cervexas e sándwichs aprendeu un pouco máis sobre as orixes da humanidade e especies invasoras.
Onte trasladábase o festival á Terraza do Furancho, onde Yeray Folgar Cameán ía dar a charla As células son moi boas dicindo non; e Sergio Fernández Boo, Adaptación dos moluscos ao cambio climático.
Hoxe, ás 20.00, é a quenda de Cultivo in vitro de especies forestales, por Pablo Manuel Piñeiro Insua; e Entre Google, a IA e a présa: Quen pensa hoxe?, de Milagros Torrado Cespón.