A REGUEIFA DA SEMANA, POR LUPE BLANCO | O San Xoán, no punto de mira da coristanquesa: ¡Olla!
23 jun 2019 . Actualizado a las 05:00 h.Arrancamos coa regueifa,
a ver se arranca o verán,
hoxe toca asar sardiñas,
que é a noite do San Xoán.
Parabéns ós de Carballo,
por organizar o conto,
creo que co mes enteiro,
van ter festiña abondo.
É domingo de cachela,
que é sinal de pureza,
algúns con tanta cachela,
fixeron boa limpeza.
Levan meses traballando
con enxeño e elocuencia,
non hai nada que envidiarlle,
a esas fallas de Valencia.
Hai que organizalo todo,
que senón logo se atranca,
vou á praza por sardiñas,
con un crédito de Abanca.
O crédito hai que pedilo,
por iso está ben sabelo,
se non cho dan aprobado,
terás que comer xurelo.
A cachela ten sentido,
aínda que algún non o crea,
para ir ardendo no lume,
a trapallada do Ikea.
Despois de ben afumados,
e de ulir a sardiñas,
prepararemos a auga,
de fiúnchos e rosiñas.
Iso di a tradición,
que hai que botarlle rosiñas,
algún/ha podía botarlle,
uns toxos e máis espiñas.
Pois eu heino de facer,
con ghusto e «dio-lo queira»,
que toca purificarse,
tamén arredar das meighas.
A noite a ser bonita,
da Coruña ata Vigo,
para pasala ca familia
e tamén con bos amigos.
Eu aquí xa me despido,
que a regueifa ten bos modos,
como di Suso de Xornes,
¡Boas festas para todos!