A exposición fotográfica poderá verse no Conco ata mediados de decembro
18 nov 2025 . Actualizado a las 05:00 h.Pode visitarse xa no albergue de peregrinos do Conco, en Dumbría, a exposición fotográfica Devoción popular na Costa da Morte, un compendio de imaxes de romarías desta comarca, froito de 26 anos de exercicio do fotoxornalismo por parte de Ana García. A exposición quedou inaugurada este pasado sábado, logo da entrega de premios do certame Territorio Vákner, e poderá verse ata mediados de decembro. É a segunda mostra que Ana García ten nestes intres na comarca, sumada á dos 20 anos do Prestige, en Vimianzo, con imaxes asemade de José Manuel Casal, ambos de La Voz de Galicia.
A primeira parada de Devoción popular na Costa da Morte foi en Cee, da man da Unidade Pastoral e dentro dos actos de conmemoración dos 70 anos da proclamación do dogma da Asunción. Agora, dende Dumbría, inicia unha peregrinación —nunca mellor dito— pola Costa da Morte. De entre as imaxes mencionou Ana algunha ben simbólica, como as de Santo Hadrián de Malpica ou de Toba (Cee), cunha figura feminina na poxa de polos: «Para la gente la romería es mucho más que un rito religioso. Es un día especial (...) La fiesta nos une a todos». Non foi doado, contou tamén, facer a selección: «No son fotos aisladas, son memoria, antropología y etnografía como hilo conductor».
Devoción popular na Costa da Morte, con todas as imaxes en branco e negro salvo unha, é unha mostra froito do compromiso de Ana, unha proposta que asume por iniciativa propia e como xeito de reivindicar un traballo e unha profesión. Ademais de edís e alcalde de Dumbría, Raúl González, participaron da inauguración representantes doutros concellos, como Vimianzo. Tamén Valentín García, secretario xeral da Lingua, e Julio Abalde, subdelegado do Goberno.