José Manuel Mato, PP de Ponteceso: «Todo o programa saíu dos veciños»

O empresario José Manuel Mato (O Couto, 52 anos), mediador de seguros, estréase como candidato á alcaldía de Ponteceso encabezando unha renovada lista do Partido Popular, logo da renuncia de José Luis Fondo e de varios cambios de portavocía ao longo deste mandato.

—Sete partidos concorrerán ás eleccións en Ponteceso. Que lle parece a cifra?

—Sendo sincero, paréceme un número excesivo. Pero hai que respectar, e felicitar, a decisión desas persoas que deron un paso adiante. Se o fixeron, é porque viron que algo lles incomoda ou non está ao gusto deles.

—O Partido Popular presenta en Ponteceso unha lista moi renovada.

—Si, porque creo que o 90 % partimos de cero. Iso tráenos inexperiencia política, claro está, pero por outra parte tamén ganas e ilusión por traballar duro e facer as cousas dunha maneira distinta.

—Que opinión lle merece o sucedido en Ponteceso neste mandato?

—Visto como veciño, foi un mandato triste e duro para o Concello. Perdéronse moitos recursos económicos (POS, alumeado, contratos...), o salón de plenos e a alcaldía convertéronse en lugares onde as faltas de respecto eran habituais, as forzas políticas víanse como inimigas en vez de como aliadas...

—Que obxectivos se marcan de cara aos vindeiros comicios?

—O primeiro para nós era facer unha lista, conseguir que o partido volvese ter unha base e unha militancia que fose independente da persoa que o liderase, neste caso eu, e dos resultados que se poidan conseguir o día 28. Queremos un proxecto duradeiro no que prime a palabra «equipo». E xa de cara ás eleccións, o obxectivo será loitar, pero sempre respectando a tódolos rivais. Eu son empresario, meterme nisto para min supón un risco, e tamén levo moitos autónomos na lista, así que non podemos permitirnos o luxo de faltarlle o respecto a ninguén nin de entrar en guerras como as destes últimos catro anos.

—Que destaca do programa que presenta para estas eleccións?

—Son arredor de 25 propostas elaboradas a base de patear as catorce parroquias e de reunirnos con tódalas asociacións, clubs e colectivos deste concello. O programa é iso, o que nos pediu a veciñanza: pistas, sendas, Casas do Maior, recuperar a Casa de Mourelle... Todo o que levamos foron peticións da xente. Neste sentido, teño que agradecer o apoio de dúas persoas que me axudaron moito neste proceso, como son o alcalde de Coristanco, Juan García, e o de Cabana, José Muíño. Eles foron os que me dixeron que os programas teñen que saír da xente, e así o estamos facendo. Tamén agradezo a disposición do presidente Rueda, que nos prometeu que tódolos conselleiros nos abrirían as súas portas e así o fixeron, cumpriron.

---

---

---