Xabier Maceiras, historiador: «De Arteixo saiu un campeón do mundo e na Eurocopa xogou un de Pastoriza»
ARTEIXO
A súa última obra, «100 anos de Fútbol en Arteixo e A Laracha», repasa a aportación de ambos concellos ao deporte rei
20 jul 2021 . Actualizado a las 17:03 h.Moi poucos se imaxinan o que significou e significa Arteixo para o mundo do fútbol. O que aínda non lese o último libro do historiador e escritor Xavier Maceiras, 100 anos de Fútbol en Arteixo e A Laracha, é moi probable que se bote as mans á cabeza ao descubrir que un dos integrantes do maracanazo, daquel Uruguai que lle gañou a final a Brasil no mundial de 1950, era fillo de emigrantes nados en Meicende. Ou que Loris Benito, futbolista que acaba de disputar con Suíza a Eurocopa, é de Pastoriza e foi mesmo bautizado na súa igrexa. E moitísimas cousas máis. Por iso hai que lelo, sorprendelo e gozalo. O libro, con prólogo escrito polo xornalista Moncho Viña, pode adquirirse nas librerías de toda a comarca.
-Cantos anos de traballo botou para parir este libro?
-Sabía que se publicaron dous traballos do fútbol na Costa da Morte. E animeime a escribir un sobre o que foi e significou o fútbol en Arteixo e A Laracha. Nin me acordo da cantidade de xente a que entrevistei. Cunha estrutura cronolóxica, repasei as fazañas, os logros, as penurias e mil anécdotas do deporte rei en ambos concellos, aos que lles debo que o libro sexa unha realidade. Sen esquecerme, porque forma unha parte importancia da nosa historia, daquelas mulleres que se vestían de curto para xogar ao fútbol en tempos complicados, cando facer iso non estaba ben visto lamentablemente por parte da sociedade.
-Adícalle moito espazo a emigración...
-A todos eses veciños de Arteixo e A Laracha que emigraron a distintos lugares do mundo para gañarse o pan e tanto eles como os seus fillos alcanzaron a cima. Por exemplo, a Cotorra Míguez, campión do Mundial do 50 con Uruguai, ou Loris Benito, que debutou con Suíza nesta pasada Eurocopa, converténdose no primeiro arteixán que xogou esta competición. Tamén directivos que tiveron o Peñarol e o Nacional do Montevideo. Ao primeiro dirixiuno Wasington Catali, casado cunha veciña de Uxes e que viña veranear. Era tal o seu vínculo, que un ano que veu xogar o Peñarol o Teresa Herrera disputou un amigable co Peñarol de Lañas nos campos de Elviña. Os directivos deste último pedíronlle disputar un encontro cos dous peñaroles e por suposto que aceptou.
-Polo que se ve, de Arteixo e A Laracha saiu unha gran canteira...
-Máis aló de Arsenio Iglesias, houbo outros, como Ramón Villaverde, un clásico do Barcelona, ou Héctor Núñez, xogador e adestrador do Valencia.