Os arquitectos premian a biblioteca de Nigrán e a rampla de chegada do Camiño Francés
CULTURA
A fábrica de Sargadelos, en Cervo, acolleu 250 persoas na entrega das doce distincións do colexio profesional COAG
18 mar 2023 . Actualizado a las 23:32 h.Duascentas cincuenta persoas presenciaron este sábado na fábrica de cerámica de Sargadelos, en Cervo, a gala da vixésima edición dos premios do Colexio de Arquitectos de Galicia (COAG), na que resultaron premiados doce proxectos de Vigo, Santiago de Compostela, Nigrán, Ourense, Cambre, Moaña e O Rosal. O encontro, organizado pola delegación luguesa do COAG, presentado polo xornalista Nico Carreiro e con dramatizacións da actriz María Roja guionizadas pola xornalista Marta Veiga Izaguirre, fixo público o recoñecemento a obras e construcións «de calidade, integradas na contorna de forma harmoniosa, e sostibles desde un punto de vista social e económico».
Os arquitectos galegos recoñeceron un proxecto de María Pilar González Ferro e Jordi Castro Andrade na rúa Tomada-Navia, de Vigo, como mellor residencial de nova planta (vivenda unifamiliar). Na mesma categoría, pero en «vivenda colectiva», o xurado valorou a proposta de Manuel Carbajo Capeáns e Celso Barrios Ceide para a construción de tres edificios para 125 vivendas con garaxe e rocho na rúa Manuel Beiras, de Santiago.
A biblioteca municipal de Nigrán, impulsada por Lucas Gándara Álvarez e Juan Pons Herrera, foi recoñecida no apartado «edificios de nova planta». En obras de restauración e rehabilitación, o COAG destacou a rehabilitación do edificio para o Centro Galego de Innovación da Formación Profesional situado en Ourense, e deseñado por Alexandra Estefanía Vázquez Müller, Roi Feijoo Rey e Santiago García Camacho.
Unha ferraxería ubicada na rúa Costanilla Tapia, de Cambre, promovida por Vicente Reigada Cordido e Susana Vázquez Pérez, levou o premio á mellor obra de interiorismo; mentres que na sección «arquitecturas efémeras e deseño», o xurado galardoou a exposición Paisaxes incultas. A metamorfose do monte galego, creada na Cidade da Cultura por Cristina García Fontán. Como mellor «planteamento urbanístico» foi recoñecido o proxecto piloto Rúa Azul, de conexión interurbana entre os concellos de Moaña e Cangas, ideado por Diego Germade Castelo e Martín Barreiro Cruz. Na categoría «deseño de espazos urbanos» obtiveron o galardón ex aequo a rampla de chegada do Camiño Francés a Santiago, situada na rúa do Gozo e proxectada por Juan José Creus Andrade e Covadonga Carrasco López; e o acondicionamento dos espazos públicos da Explanada do Horizonte Portecelo, no Rosal, de María Fandiño Iglesias.
En «divulgación de investigación» recibiron a distinción ex aequo o Manual de construción para miniarquitectos de Nuria Prieto González, e As precursoras, de Silvia Blanco Agüeira, publicado en VAD06. Veredes, arquitectura e divulgación. Foi premiado, ademais, o proxecto fin de carreira «Faber | ludens. Vector lúdico-loxístico no borde litoral», de Alejandro Vázquez Correa. Finalmente, o premio á traxectoria profesional, entregado pola decana do COAG, Elena Ampudia, recoñeceu o labor da arquitecta Pascuala Campos de Michelena. Entre os asistentes, estiveron a conselleira de Medio Ambiente, Territorio e Vivenda, Ángeles Vázquez, e representantes de colectivos de arquitectos.