Recuncho da Lingua, Abraham Cupeiro e Ramiro Varela foron galardoados
12 nov 2025 . Actualizado a las 05:00 h.Coincidindo este ano co propio día de San Martiño, o Concello da Estrada entregou onte os XXXV Premios San Martiño de Normalización Lingüística ao espazo radiofónico Recuncho da Lingua, ao músico Abraham Cupeiro e ao médico Ramiro Varela Cives.
O acto arrancou con música a cargo de A Requinta de Lampai. Chus Fernández Bascuas asumiu a presentación dos premios e María Ruzo deu lectura á acta do xurado. Foi despois cando comezaron a entregarse a esculturas do artista Manolo Vilaverde, que dende hai anos simbolizan este recoñecemento estradense a persoas e entidades que, dende os máis variados ámbitos, realizan un labor de defensa e normalización da lingua galega.
Iván Sanmartín, integrante do padroado destes premios, entregou o Premio San Martiño no ámbito comarcal, que este ano recae no programa Recuncho da Lingua, conducido por Pilar Bernárdez, dende hai seis anos, na emisora municipal Radio Estrada. «Ademais de promover o uso do galego entre a xente nova e de divulgar a obra de distintos referentes literarios estradenses, este espazo, de periodicidade semanal, é tamén un foco difusor da nosa historia, das nosas tradicións e da nosa cultura popular», sinalou o xurado.
Tras as palabras de agradecemento desta mestra da parroquia de Berres, foi o conselleiro de Cultura, Lingua e Xuventude, José López Campos, quen entregou o Premio San Martiño Galicia Enteira ao músico Abraham Cupeiro, especializado na recuperación de instrumentos ancestrais que utiliza para crear novas sonoridades. O músico tamén destaca pola recuperación de instrumentos tradicionais galegos e polo uso da lingua nai ao longo de toda a súa traxectoria artística.
Foi o alcalde da Estrada, Gonzalo Louzao Dono, o encargado de entregar o Premio San Martiño a toda unha vida de defensa do galego. Recaeu no médico estradense Ramiro Varela Cives.
O rexedor quixo comezar e pechar a súa intervención con versos de Avelina Valladares, a quen este ano se lle dedica o Ano Cultural. Concretamente, escolleu o poema Miña xoia e identificou Galicia con galego. «Se xoia é Galicia, para a Cantora da Ulla e para todos nós, xoia é o noso idioma». «É o galego o que nos convoca aquí cada ano, nuns galardóns que son unha mostra pequena, pero moi sincera, do recoñecemento e agradecemento da comunidade estradense a aqueles que fan da lingua non só unha bandeira, senón tamén unha ferramenta para a vida; para o día a día. Só así se pode edificar e garantir o seu futuro», dixo o alcalde. Despois de agradecer a sensibilidade e traballo de Pilar Bernárdez, Gonzalo Louzao tirou tamén dunha metáfora para identificar a especialización de Abraham Cupeiro na recuperación de instrumentos ancestrais co idioma. «A nosa lingua non é unha reliquia. Está moi viva e é un instrumento que segue vibrando e facendo vibrar cada vez que o tocamos», sostivo.
En relación a Varela Cives, o mandatario sinalou que o seu traballo «discreto pero fondamente transformador, é a proba de que a normalización non se constrúe só con grandes xestos, senón co esforzo diario de quen cre na lingua e a fai presente en cada ámbito da súa vida».