O músico estradense Juan Núñez gaña o seu primeiro premio como compositor
A ESTRADA
O músico estradense Juan Núñez Seoane acaba de conseguir o seu primeiro premio como compositor, aínda que xa fora finalista no seu día na modalidade de composición coral. No marco do XVIII Concurso Galego de Composición da Federación Galega de Bandas de Música Populares o estradense acadou agora unha mención na sección de Dificultade Media coa obra O Camiño dos Arrieiros.
Músico profesional, Juan Núñez traballa na Banda da Escola Naval de Marín e é un dos fundadores do Obradoiro de Música Moderna Carlos Barruso. Nesta formación na que foi no seu día director do Coro forma parte agora da Big Band como clarinetista e saxofonista.
O estradense comezou a súa carreira con só doce anos na Banda de Música Municipal da Estrada. Pasou logo por bandas como a da División Acorazada e a Banda Municipal de Alcorcón, estando en Madrid, ou a Banda Militar de Ferrol, antes de conseguir praza na Banda da Escola Naval de Marín.
Coa pandemia, Juan Núñez empezou a mergullarse máis fondo no estudio da composición, que na actualidade ocupa boa parte do seu tempo. Como resultado deste proceso, o estradense acaba de acadar o seu primeiro premio cunha obra dedicada ao Camiño da Geira e dos Arrieiros, unha das rutas xacobeas que atravesa A Estrada. A mención conseguida traerá consigo a publicación da partitura, que a partir de agora estará a disposición das bandas que queiran interpretala e poderá ser elixida como tema para os próximos concursos de interpretación.
A obra fai uso do son para describir a experiencia que deberon ter os peregrinos de séculos pasados en ruta cara Santiago, con temas que aluden ás penurias e medos do camiño, á paisaxe ou á ledicia da chegada a Compostela.