A sede de Afundación acolle ata 28 de xaneiro a exposición «Ferrol no tempo»
19 nov 2022 . Actualizado a las 21:29 h.Ferrol, que exhibe dende onte a mostra Ferrol no tempo, é a segunda urbe galega que acolle o proxecto compartido pola Consellería de Cultura e Afundación Cidades no tempo. Ata o 28 de xaneiro, esta importante cita cultural é dunha gran complexidade técnica. Nela foi necesaria a intervención de distintos axentes de Ferrol e tamén doutras partes de Galicia.
Os visitantes poderán interactuar con pezas como a gran pantalla táctil que permite descubrir os diversos acontecementos que foron conformando a urbe, ou ser testemuños do diálogo entre a vida cotiá e a industria, como plasma Segura Torrella. O seu cadro Cara a Fisterra é unha das grandes obras pictóricas dos anos 70 en Galicia, na que aparecen as mulleres ataviadas para os traballos domésticos e eles, para a industria.
A través dunha liña temporal, se ben permite configurar libremente a visita, o público atoparase cos vestixios castrexos de Ferrol, o seu pasado romano ou o primeiro documento no que aparece mencionado San Xiao de Ferrol, datado do ano 1089 d.C. Máis adiante, a exposición achega o público ao proceso de construción da cidade, co Arsenal como elemento configurador. A mostra conta tamén cun retrato de Concepción Arenal e coas notas de Lopo García de Toar, un notario ferrolán que recuperou 23 poemas do cancioneiro de Afonso Paes do tempo dos Andrade, dun valor incalculable para a literatura peninsular daquel entón.
En palabras do historiador Guillermo Llorca, que coordina a mostra, «será difícil contemplar unha exposición desta envergadura proximamente». Descobre anacos da historia a miúdo descoñecida polos propios ferroláns: a cidade portuaria foi a primeira de Galicia cunha Escola de Artes e Oficios, centro libre de ensino gratuíto para instruír aos fillos dos obreiros. Por último, o visitante chega á época actual a través das historias contadas por seis ferroláns. Distintas voces e espazos da cidade conforman o desenlace da exhibición. Nesta sala hai espazo para as Meninas de Canido explicadas polo impulsor, Eduardo Hermida; ou para os Maios, que comenta a profesora Ánxela Loureiro.
Ao acto de inauguración de onte asistiron o conselleiro de Cultura, Román Rodríguez; o director de Afundación, Pedro Otero; o presidente de Afundación, Miguel Ángel Escotet; o comisario, Manuel Gago; o coordinador de Ferrol, Guillermo Llorca; a coordinadora de Cultura de Afundación, Marité Cores e a directora da Cidade da Cultura, Ana Isabel Vázquez. Gago e Llorca fixeron un percorrido polas máis de cen pezas de Ferrol no tempo.
Llorca sinalou a «imperiosa necesidade de dotar a Ferrol dun museo», co que concordou Mato, engadindo que «esta cidade adoece de autoestima, e esta escolma non vai deixar indiferente a ninguén».