Esta formación política xa levou o asunto tres veces ao Congreso
22 nov 2025 . Actualizado a las 21:22 h.O Bloque Nacionalista Galego (BNG) de Pantón reclama de novo o arranxo integral e urxente da estrada N-120a, unha vía que consideran «vital» para este municipio e que leva anos moi deteriorada. Esta estrada é a principal vía de acceso ás parroquias de Atán e Pombeiro, así como á aldea dos Peares e á presa do encoro, no concello de Pantón. Trátase do trazado da antiga estrada nacional que comunicaba Monforte e Ourense, que foi substituída pola nova N-120 nos anos 90.
Segundo explican desde o BNG de Pantón, a estrada presenta un estado de abandono con cascallos nas beiras, o firme en mal estado e escorrentías de auga en varios tramos entre Os Peares e Guítara. Unha situación que, denuncian, non só supón un perigo para a seguridade viaria, senón tamén «unha falta de respecto» para as persoas que residen ou visitan esta parte da Ribeira Sacra. A portavoz desta formación política en Pantón, Rosana Prieto, considera inadmisible que os veciños teñan que circular «con cascallos arredor e cun piso en mal estado e tomado polas escorrentías de auga».
Desde o BNG levan tempo trasladando esta reclamación a distintas administracións. Segundo indican, presentaron ata tres iniciativas no Congreso dos Deputados, mais o Goberno de España «fixo caso omiso» a todas elas. Así mesmo, promoveron accións no ámbito municipal e galego, ligando a necesidade do arranxo á condición de Ben de Interese Cultural (BIC) que ten a paisaxe que percorre esta vía.
Neste sentido, sinalan unha contradición: «Non se entende que esta zona sexa o núcleo desa paisaxe da auga que pretenden declarar Patrimonio Mundial mentres nos teñen así unha estrada principal e da que non existe alternativa para acceder á parte das nosas ribeiras».