O médico Manuel Díaz González será homenaxeado con tres xornadas de actividades no seu municipio natal, Bóveda e Lugo
08 sep 2026 . Actualizado a las 17:21 h.A asociación A Memoria é Náufraga, que xestiona en Bóveda o centro cultural A Casa da Memoria, organizará entre o venres e o domingo unhas xornadas dedicadas ao médico Manuel Díaz González, coñecido como «o Pequeniño do Incio», con motivo do 90 aniversario da súa morte. As actividades desenvolveranse en Bóveda, O Incio e Lugo.
Nado en 1886 na parroquia de Sirgueiros —no Incio—, Manuel Díaz González morreu asasinado neste mesmo municipio o 11 de setembro de 1936. A principios da década de 1920 instalouse no seu concello natal para exercer como médico e desempeñou tamén as funcións de alcalde e deputado provincial. Foi coñecido como «o médico dos pobres» por non cobrar pola súa atención ás persoas necesitadas e militou na Organización Republicana Gallega Autónoma e en Izquierda Republicana. Ao estalar a Guerra Civil refuxiouse na aldea de Xullán —na parroquia de Toimil, en Bóveda—, no mesmo edificio onde hoxe o funciona o centro A Casa da Memoria. Alí foi capturado por unha partida de falanxistas vinculada á chamada Escuadra Negra, que operou na comarca de Sarria, e morreu asasinado pouco despois na parroquia de Eirexalba.
A continuación detállanse as actividades que se celebrarán durante estas xornadas, que se organizan co apoio da Vicepresidencia da Deputación lucense.
DÍA 11
12.00 horas. No centro A Casa da Memoria, en Xullán, será descuberta unha placa conmemorativa en memoria de Manuel Díaz González. A continuación ofrecerase unha intervención artística na que se estreará a peza musical Os justi meditabitur, composta por Patricia Castro e dedicada ao médico asasinado. Actuarán a propia Patricia Castro —intérprete de fagot, clarinete, handpan e shruti—, a pianista Xiara e a bailarina Rosa Acuña.
17.00 horas. O centro cultural e sociocultural O Vello Cárcere de Lugo acollerá unha conferencia e unha mesa redonda que será coordinada polo historiador e catedrático Ramón Villares, antigo director do Consello da Cultura Galega. A conferencia, titulada «O legado do doutor Manuel Díaz González, o pequeniño do Incio», correrá a cargo de José Luis Díaz Gómez, sobriño do homenaxeado e investigador da Universidad Nacional Autónoma de México. Na mesa redonda, baixo o lema «A vida e a obra do médico no contexto da Segunda República», participarán José Luis Gómez, o historiador Lourenzo Fernández Prieto e os escritores Claudio Rodríguez Fer e Carmen Blanco.
DÍA 12
13.00 horas. No centro A Casa da Memoria ofrecerase un concerto de Xosé Constenla, cantautor especializado en memoria histórica.
18.00 horas. No monolito instalado no lugar onde foi asasinado Manuel Díaz celebrarase unha ofrenda floral. Seguidamente haberá outra ofrenda nun busto dedicado ao médico na capital municipal.
DÍA 13
12.00 horas. Todas as actividades desta xornada desenvolveranse no centro A Casa da Memoria. A primeira será a proxección do documental O médico dos pobres, dirixido por Francisco Rioboo e producido por iniciativa da asociación A Memoria é Náufraga.
14.00 horas. Xantar en memoria de Manuel Díaz.
16.30 horas. A escritora Olga Novo e o arqueólogo Xurxo Ayán ofrecerán unha intervención denominada «Historia e poesía: memoria viva», que combinará a investigación histórica e a poesía.
18.00 horas. A última actividade das xornadas consistirá na representación da obra teatral Vermellos a cargo da compañía Rebuldeira Teatro de Sarria. Esta peza, dirixida a maiores de 16 anos, mestura personaxes reais e imaxinarios, un dos cales é Manuel Díaz González.