José Luis Álvarez: «Para nós é moi importante recuperar a Mostra dos Viños de Pantón despois de dous anos»

O alcalde de Pantón, José Luis Álvarez, inaugurará ás 13.00 horas deste sábado —xunto co delegado territorial da Xunta, Javier Arias— unha nova edición da Mostra dos Viños da Ribeira Sacra. Como sucedeu con outras feiras do viño, a de Pantón non se puido celebrar nos dous últimos anos. O festexo continuará o domingo con diversas actividades, entre as que figura a lectura do pregón —tamén ás 13.00 horas— a cargo do enxeñeiro agrícola José Mouriño Cuba, unha figura clave na creación da denominación de orixe Ribeira Sacra.

—Que significa para o municipio volver celebrar a feira?

—Para nós é moi importante recuperar a mostra despois de dous anos pola repercusión que ten na promoción dos nosos produtos tradicionais, non só do viño. Porque ademais de viño, en Pantón tamén hai carne de cachena, queixo, mel... Por outro lado, é a primeira vez que a feira se celebra coa categoría de festa de interese turístico, que sen dúbida é outra axuda importante para dar a coñecer o noso municipio. E tamén é importante para os veciños, porque é unha ocasión para reunirse con xente de Pantón que vive noutras partes de Galicia, con amigos e familiares que veñen estes días para gozar da feira. Hai que recordar que ademais demais da Mostra dos Viños, tamén recuperamos a Festa da Empanada, e que durante estes días haberá moita animación musical. Despois destes anos de pandemia en que case non houbo festas en ningún sitio, a xente ten moitas ganas de ir recuperando a normalidade e hai que animala a que o faga.

—En que situación está hoxe o sector vinícola en Pantón?

—É un sector que segue medrando e hai cada vez más xente que se anima a plantar novos viñedos e a recuperar outros que estaban abandonados. No municipio hai moitas zonas tradicionais de viñedo que se poden recuperar e eu sempre digo que as mellores son as que están á beira do río. Na feira deste ano haberá oito adegas. Hai unha adega local que non pode participar nesta edición porque está estes días nunha feira en Alemaña, pero para compensar hai outra que abriu hai pouco e que si toma parte na Mostra dos Viños. É unha proba máis de que o sector do viño está crecendo no municipio.

—E o sector turístico?

—O municipio de Pantón xa conta cunha infraestrutura importante que segue desenvolvéndose. Hai pouco tempo comezaron a funcionar os primeiros apartamentos turísticos na capital municipal e xa hai como tres meses que abriu a hospedaría do convento das Bernardas, que xa tivo moitos visitantes durante este tempo. Ademais temos casas rurais, vivendas turísticas, o balneario e o campo de golf de Augas Santas, unhas rutas de sendeirismo moi atractivas e un patrimonio histórico importante, así que no municipio non faltan sitios onde hospedarse nin cousas interesantes que ver. O que vén unha vez a Pantón, seguro que repite.

—O patrimonio histórico visitable está aumentando agora grazas ás escavacións arqueolóxicas do Preguntoiro, en Pombeiro.

—O Preguntoiro está adquirindo máis importancia como lugar de interese arqueolóxico e turístico, e temos que sinalar que por ese sitio xa pasaba desde hai moito tempo unha ruta de sendeirismo que a partir de agora cobrará máis valor do que xa tiña. Pero esa é só unha parte do patrimonio do municipio, que comprende as igrexas románicas e moitos máis elementos, e que merece ser coñecido con detalle en moitas visitas.

---

---

---