Coloquios, escaleiras e vídeos: o instituto de Sarria que pisa forte pola igualdade
SARRIA
Tres maxistrados galegos impartiron este xoves unha charla no IES Gregorio Fernández sobre a violencia de xénero e inauguraron a «Escaleira da Igualdade», no marco das actividades de sensibilización que desenvolve o centro ao longo de todo o curso escolar
14 nov 2025 . Actualizado a las 05:00 h.No IES Gregorio Fernández viviuse este xoves un día intenso de formación, aprendizaxe e concienciación sobre a violencia de xénero da man de tres xuíces e maxistrados galegos. Sandra Piñeiro Vilas, presidenta da Audiencia Provincial de Lugo, Dalila Dopazo Blanco, maxistrada do Xulgado do Social número 3 de Lugo, e Luís Villares Naveira, maxistrado na Sala do Contencioso-Administrativo do Tribunal Superior de Xustiza de Galicia, achegáronse a Sarria de xeito desinteresado para falarlles aos alumnos de igualdade, estereotipos, machismo, feminismo, violencia, noticias falsas, delitos...
Fixérono no marco das actividades que organiza o centro ao longo do curso escolar e que teñen como obxectivo sensibilizar sobre a violencia de xénero. Onte, ademais dunha charla na que se trataron diversos aspectos, tanto legais coma sociais, da violencia de xénero, como a desigualdade presente na propia tradición ou no dereito, os xuíces inauguraron a «Escaleira de Igualdade» do IES Gregorio Fernández, situada nos chanzos do edificio principal do propio centro. Unha escaleira, explican, composta de lemas «que promoven a loita contra a discriminación de xénero e o empoderamento feminino, escollidos entre os achegados por toda a comunidade educativa».
No coloquio dos tres xuíces e na inauguración das escada interviñeron, ademais, a directora do centro sarriao, Ana Valín, a coordinadora do Plan Proxecta «Donas de si», Isabel Rodríguez Mate, a coordinadora do Equipo de Dinamización da Lingua Galega, Elena Corujo, e a edil de Sarria, Geni Valcárcel. As actividades, afirman, foron deseñadas para o Plan Proxecta+ «Donas de si», da consellería de Política Social e Igualdade.
Máis actividades
Os actos deste xoves complemétanse con outras actividades que se irán desenvolvendo ao longo deste curso. Entre elas un vídeo —presentarase o 8 de marzo— sobre a discriminación das mulleres na historia de Sarria, e que contará coa participación (ademais dos membros da comunidade educativa), de figuras referentes a nivel cultural como Xurxo Souto (que será o narrador), Xulio Pardo de Neyra (escritor e profesor doutor de Filoloxía Galega na Universidade da Coruña); Francisco Castro Veloso (filósofo, músico, escritor e editor); Xosé Luís Rivas Cruz (profesor, cantautor, compositor e musicólogo); María Pilar Campo Domínguez, Marica Campo, (escritora e profesora); Branca Villares Naveira (bióloga e música); Uxío Outeiro (profesor de Lingua Portuguesa na EOI), Carme López Fernández (musicóloga, intérprete e doutora na USC; Iván Ramil Vázquez (biólogo e profesor de ensino secundario) Ruth Rodríguez Bermúdez (veterinaria e profesora doutora da USC) e Mercedes Vázquez Saavedra (fotógrafa especializada en mulleres, ademais dos tres maxistrados mencionados. Todos colaboran de xeito desinteresado.