Leña!


Falando do que cambiou o mundo, contaba meu pai en máis dunha ocasión cando os nenos ían ao monte a por leña e piñas. Leña, o que se di leña, non era. Pero apañaban as póliñas que podían, porque todas servían para facer lume. Así limpaban os camiños. O que estaba no público entendíase que se podía coller. Outra cousa sería roubar a leña que acabase de cortar un veciño. Iso non. Pero recoller do chan os anacos de pólas que caeron para arredar o frío do inverno ou prender a cociña, si. Agora esas pólas son refugallos desprezables. Se nolos quitan de diante, ata damos as grazas.

 Pero algo daquilo aínda queda, non vaian pensar. A vila de Arcos de la Frontera, en Cádiz, estase a facer famosa pola leña. Non en xeral, pero si polo caso concreto dun concelleiro. Está acusado de apropiarse de entre 16 e 30 toneladas de madeira procedente da corta duns cipreses do Concello. As árbores xa había que quitalas; o problema foi que as levou para casa pagando os portes cos cartos do Concello, aproveitando que era o delegado de Medio Ambiente naquel momento.

Agora está na oposición, e a Fiscalía pide para el 27 meses de cárcere e 8 anos e medio de inhabilitación. A madeira valía 2.240 euros. Os portes, 480 euros.

Está ben o que fixo? Non. Vouno defender? De ningunha maneira. Poño en cuestión a magnitude da pena? Tampouco. Pero non me sae da cabeza a «equidade». Por poñer un exemplo actual: a Rodrigo Rato caéronlle o dobre de meses por gastar coas tarxetas black 15,2 millóns de euros.

Déronlle leña abonda?

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
19 votos
Comentarios

Leña!