Celebra terá lugar durante este fin de semana no recinto feiral de ExpourenseHaberá dous pases cada día do evento para ver as últimas novidades.
22 nov 2019 . Actualizado a las 05:00 h.Dani Ríos, «O casamenteiro», guiará ás parellas na súa busca de produtos e servizos
? Celebra cumpre 20 anos acompañando ás familias e empresas galegas, e sobre todo ás de Ourense, na organización dos seus eventos ofrecendo os produtos e servizos nos que prima a calidade, o deseño e a orixinalidade. O Salón de Vodas, Bautizos e Comuñóns e Actos Sociais organizado por Expourense celébrase esta fin de semana, días 23 e 24 de novembro, no recinto feiral e reunirá a un total de 40 expositores procedentes nun 85 % da provincia de Ourense.
Esta edición número vinte foi presentada onte na Confederación Empresarial de Ourense nun acto no que participaron o presidente do comité executivo de Expourense, Jorge Pumar; a presidenta da Federación de Comercio de Ourense, Beatriz Gómez; e a directora de Administración de Expourense, Cristina Álvarez. En representación dos expositores estivo o xerente de Paris Diffusion Perruqería e Estética que é un dos poucos que leva 20 anos seguidos participando nesta cita. Lembrou os inicios do salón (en marzo do ano 2000) e como era dos poucos que había en España nese momento.
Celebra 2019 primará a interacción entre os expositores e os visitantes a través da presenza do oficiante Dani Ríos, O Casamenteiro, que guiará ás parellas na súa busca de produtos e servizos. Para esta edición cóntase ademais coa colaboración da empresa Bodaspack, unha plataforma web galega especializada na organización integral de vodas.
Pases de moda
Como é habitual, a oferta expositiva complementarase con varios pases de moda nupcial, festa e infantil. Estarán coordinados pola Axencia Luena e neles participarán as seguintes empresas: Nicandra (noiva e festa), As Badaladas (noiva e festa), Angelo Milano (noivo), Loyma (xoiería), París Diffusion (perruquería). Este ano súmanse a esta actividade Little Kings Ourense (moda infantil de festa), El Tocador de Anabel de Allariz (estética) e Duet Moda, empresa de moda nupcial e ceremonia de Sarria (Lugo). A meirande parte destas empresas con coleccións de fabricación e deseño propio. O desfile infantil será ás 17.00 h e o de noivos e festa ás 18.30 h. Os desfiles estarán presentados por Manu Valreal da Axencia Luena que estará acompañado por coñecidas artistas.
As estatísticas indican que se reduce cada vez o número de convidados nos diferentes eventos (130 de media nunha voda, por exemplo) pero que medra o investimento en cada un deles e iso non significa outra cousa que se coidan cada vez máis os detalles e os xestos de cariño cara os convidados. Estimar o custo medio dunha voda non resulta sinxelo xa que vén determinado por moitos factores como o estilo de cerimonia, o número de convidados, lugar de celebración, época do ano, tipo de viaxe de lúa de mel, etc. Aínda así, os distintos datos dispoñibles indican que o custo medio dunha voda en Galicia ronda os 21.000 euros, o que supón un desembolso importante para as familias, pero tamén unha oportunidade de negocio para as empresas especializadas que cada ano acoden a Celebra.
Horario de visita
O horario de Celebra, que se desenrola no recinto feiral de Expourense será sábado e domingo de 11.00 a 14.30 horas e de 16.00 a 20.30 horas. A entrada ten un custo de 2 euros (menores de 12 anos gratuítos). A información desta cita actualízase na web www.expourense.org e nos seus perfís sociais (Facebook e Instagram). Ademais, realizaranse distintos sorteos entre as visitas para favorecer que volva a ser unha cita multitudinaria.
Realidade virtual e seguros, entre as novidades nun sector que evoluciona
Celebra 2019 presentará unha ampla oferta de produtos e servizos para que as familias que están organizando o seu eventos para o 2020 ou ata para o 2021, poidan atopar aos provedores necesarios para a súa voda, bautizo ou comuñón como o lugar onde celebrar o banquete; os traxes de noivo, noiva e festa; perruquería e estética; arranxos florais; fotografía; xoiería; viaxes; animación e discotecas móbiles; agasallos; actuacións musicais; «espellos máxicos» que son fotomatóns; coctelería; prensa especializada, etcétera. Todas as empresas ofrecerán os produtos e servizos necesarios para organizar un evento 100% personalizado, diferente e a prezos competitivos.
Entre as novidades destaca a realidade virtual que ofrece unha empresa especializada en fotografía e vídeo, a única no norte de España que presta ese servizo. Realizan vídeos onde gravan todos os detalles ao redor dos noivos e que hai que ver despois con gafas de realidade virtual, conseguido así unha sensación totalmente inmersiva no evento. Cambiase así o tradicional álbum de fotos e vídeo por unha especie de «videoxogo» da voda. Outra das novidades que poderá atoparse será unha asesoría que ofrece o único «seguro de protección de vodas e eventos» que ofrece a tranquilidade de estar cubertos no caso de que o evento non se puidera celebrar finalmente polo motivo que fose desde a climatoloxía adversa ou a ausencia no día sinalado dalgún dos servizos contratados. Por cubrir, cobren ata a perda das alianzas de voda.