Ultiman a cesión temporal ao Museo de Pontevedra de «A derradeira lección do mestre», de Castelao

Luis López, presidente de la Deputación de Pontevedra, encabeza unha viaxe institucional a Arxentina e Uruguai co obxectivo de pechar o acordo de cesión temporal do cadro A derradeira lección do Mestre, de Castelao, para o Museo de Pontevedra. En paralelo, estreitará os lazos coa comunidade galega residente en Bos Aires e en Montevideo, onde ten previstos encontros con colectivos veciñais e empresariais.

Dende o organismo provincial destacaron que facer oficial o acordo de cesión temporal de A derradeira lección do mestre posibilitará completar a maior colección artística do intelectual de Rianxo que custodia o Museo de Pontevedra e redondear a conmemoración do 75 aniversario do seu pasamento. Neste sentido, precisaron que as conversas co Centro Galicia de Buenos Aires, titular desta emblemática obra de arte da que o Museo Provincial garda o debuxo orixinal, están moi avanzadas e só queda asinar o contrato de cesión que xa se pactou hai un mes coa visita do seu presidente José María Vila Alén a Pontevedra.

«Hoxe damos o primeiro paso para que Castelao poida impartir a súa derradeira lección na súa segunda casa: o Museo de Pontevedra», sinalou Luis López, mentres que o vicepresidente Rafa Domínguez enfatizou o feito de que «desde que chegamos ao Museo de Pontevedra tiven unha obsesión, que a obra cume de Castelao puidese vir ao Museo de Pontevedra para dialogar con resto da súa obra».

---

---

---