Os tres equipos mariñanos que tomaron parte na sexta xornada da Liga Provincial de fútbol sala masculina conseguiron sendas vitorias.
O Pub Flanagan's-Xove FS continúa no alto da clasificación e co paso das xornadas vai mellorando as súas prestacións e desfacéndose dos seus rivais con maior contundencia. Nesta ocasións impúxose na pista do Parrillada Porta Santiago de Lugo por un concluinte 1-11.
Pola súa banda, o Opticalia Ribadeo logrou o seu segundo triunfo da campaña, mentres que o Cubelas estreou o seu casilleiro de vitorias.
Os xogadores do Opticalia non o tiveron doado ante o Castroverde FS, pero venceron por tres tantos a dous. Máis doado o tiveron os da parroquia ribadense de Cubelas co Chevrolet Becerreá FS, conxunto ao que derrotaron por 4-1.
Con estas vitorias, as dúas escuadras ribadenses conseguiron escalar algúns postos na clasificación. O Opticalia é agora oitavo, con sete puntos, mentres que o Cubelas sube ata a undécima praza e acumula catro puntos.
O Industrial Recense, que gozou da súa xornada de descanso a pasada fin de semana, continúa cuarto con 12 puntos. Está a só tres do líder e do segundo.