Loita Amada, coa trombonista viveirense Xiana Naval, presenta «Resistir é vencer», o seu terceiro álbum

A banda Loita Amada, liderada por Jasper e da que forma parte a trombonista viveirense Xiana Naval Chaves, vén de publicar o seu terceiro álbum, que leva por título Resistir é vencer. O novo traballo, gravado nos estudos Garate, de Andoain, o pasado mes de abril baixo a produción de Kaki Arkarazo, está composto por once cortes nos que, sobre unha base de rock duro con variadas influencias como punk, folk, metal, reggae, ska, pop ou música tradicional, plasma a súa poesía revolucionaria nun momento no que medio mundo está en guerra mentres a outra metade mira para outro lado. «A temática tratada amosa desde a pasividade de Europa fronte ó xenocidio do pobo palestino á impotencia experimentada no activismo político e musical, pasando pola dignificación do legado dos nosos avós e avoas, sempre deixando espazo para o amor, ben sexa platónico ou o que se sinte por unha irmá», destacan desde Loita Amada. 

O disco inclúe un elenco de colaboracións artísticas «de luxo», como: Nuno Pico (Grande Amore), «o da Gándara», Hartiz Zabaleta (Ameba), Luken Arkarazo (Odolaren Mintzoa), Mini Rivas (Fuxan os ventos), Xiana Lastra (A banda da loba), Vituco Neira (RuxeRuxe), Tanxugueiras e o trikixilari Joseba Tapia. 

O estudo de audiovisuais Cartílago factura o traballo dos vídeoclips ou visuais que acompañan a cada peza. 

A presentación ante o público terá lugar este venres e sábado, días 10 e 11 de outubro, na Gentalha do Pichel, en Santiago de Compostela, onde haberá numerosas actividades. O día 12 Loita Amada actuará nas festas do San Froilán, en Lugo. 

Xiana Naval tamén é membro de Brassica Rapa, e preside o colectivo Pensamento e Sementeira, de Viveiro. 

---

---

---