Só en Ribadeo síguense neste momento 13 casos activos de violencia de xénero

A subdelegada do Goberno, Isabel Rodríguez, e o alcalde de Ribadeo, Fernando Suárez, presidiron onte a xunta local de Seguridade na que se renovou a colaboración das dúas administracións na loita contra a violencia de xénero. Na xuntanza, celebrada por vía telemática, aprobouse un novo protocolo de coordinación e colaboración entre a Garda Civil e a Policía Local de Ribadeo para a protección das vítimas de violencia de xénero.

A subdelegada, Isabel Rodríguez, informou de que a data de hoxe son 13 os casos activos no Sistema Viogen de Seguemento Integral de mulleres residentes no concello de Ribadeo, 1 de risco medio, 2 de risco baixo e 10 de nivel de risco non apreciado.

A subdelegada do Goberno felicitou ao alcalde e ao Concello de Ribadeo pola súa implicación na loita contra a violencia de xénero, que «é un problema de toda a sociedade e no que todos debemos estar comprometidos».

Isabel Rodríguez explicou que o novo protocolo incorpora actualizadas as normativas e regula como será a implicación da Policía Local na protección das mulleres de Ribadeo que son vítimas de violencia de xénero. O documento establece os mecanismos de coordinación entre a Garda Civil e a Policía Local na execución e seguimento das medidas xudiciais acordadas para a protección de vítimas de violencia de xénero residentes neste termo municipal. Trátase de buscar a maior eficacia para a protección das vítimas nestes casos de violencia de xénero.

---

---

---