Licenciada en Dereito, Dolores García tivo ilustres compañeiros de facultade. Entre eles, Mariano Rajoy, Javier Gago e Antolín Sánchez Presedo. O percorrido polos personaxes políticos que a rodearon e a rodean comeza por eles: «A Mariano coñecino aquí, en Vilagarcía, cando a súa familia vivía en León e viñan no verán á praia; lembro que na facultade sentaba sempre cos de Pontevedra; con Javier eu non tiña moito trato, pero a súa imaxe era a dun pouco chapón; tamén Rajoy era moi estudoso. ¿Sabe quen estaba con nós? A muller de Ventura Pérez Mariño, Dolores Galobar, que traballa no Valedor do Pobo».
-Se lle parece podemos falar, agora, dos seus compañeiros na política vilagarciá. Comecemos polo seu propio grupo. ¿Que tal Marcelino Abuín?
-Coa súa maneira de ser, é un home que traballou e segue traballando por un proxecto de cidade no que cre. Brillante.
-Victoria Hierro.
-Chegando ela doutra etapa, para min foi un descubrimento. Unha persoa con valores. Vive moitísimo as cuestións vencelladas a Muller e Sanidade.
-José Membrives.
-Probablemente a súa é a concellería menos agradecida. Pasouno mal en moitos momentos e a min criticóuseme que non o apoiase abondo. Persoalmente sempre o respaldei.
-Rodríguez Cuervo.
-Dende o comezo trateino con cariño. Dixo sempre que era o seu último mandato. Boa relación, pero custoulle integrarse ou o fixo á súa maneira.
-Susana Camiño.
-Non a coñecía persoalmente. Ela sempre di que a perde a súa maneira de ser, pero no ámbito educativo fixo moitísimas cousas, varias, por certo, que lle correspondería facer á Xunta. Implicouse moi a fondo en todos os programas.
-Tania García.
-A Tania si a coñecía. Unha persoa demasiado responsable, moi preocupada.
-Dolores Couso.
-Levámonos moi ben. A súa decisión de marchar tamén foi completamente persoal.
-Modesto Pose.
-A Modesto téñolle un aprecio especial, e encima é médico. Xa o dixo el, a nosa é unha relación de agarimo. Sempre foi moi comprensivo.
-Imos agora cos socios. ¿Xosé Castro Ratón (BNG)?
-Xosé, dígolle ás veces, somos parella. «Política, ¿eh?», resposta el. Somos unha parella política moi ben avenida .
-¿E con Ana Lorenzo e Rosa Abuín (BNG)?
-Moi ben, e iso que ás veces non estamos de acordo. Esas son pelexas de verdade, e ao cabo amañámonos sempre.
-Pasemos, logo, á oposición. Tomás Fole (PP).
-El tiña máis experiencia ca min, pero podo dicir que nunca votaría por el. Non me ofrece peso como persoa. Non ofrece a seguridade que si che pode dar, por exemplo, Castro Ratón. Parece ser que aprendeu co tempo, pero se este é xa o seu terceiro intento... xa me dirás. Dende fóra non me parece unha persoa moi traballadora. Non ten peso pero pode estar ben para ir de copas... aínda que nunca coincidimos.
-Juan Fajardo (EU).
-Deume pena cando non conseguimos un acordo de goberno. No trato é unha persoa cordial, pero politicamente parece que chegas a acordos e despois non sabes que pasa. Entendo que teña que distanciarse do PSOE, porque en moitos aspectos estamos máis á esquerda ca eles e podémolos comer.
-José Luis Rivera.
-Ten moita experiencia, sabe o que é un Concello. Institucionalmente é o máis correcto, como vén de demostrar co anuncio da miña renuncia.