O equipo canteirán derrotaba pola mañá o Universidade de Vigo, e o primeiro plantel vilagarcián estreaba título copeiro pola tarde a costa do anfitrión P.R.C.
18 may 2016 . Actualizado a las 05:05 h.O Día das Letras Galegas do 2016 será lembrado sempre cun sorriso de orella a orella na familia dos Ingleses R.C. Porque onte o club vilagarcián conquistaba a dobre condición de campión da Copa Xunta. Co seu equipo Sub-18, xa afeito noutras edicións a erguer o trofeo de gañador, impoñéndose pola mañá en Monteporreiro 30-17 ao combinado do Universidade de Vigo; e co cadro sénior facendo o propio co anfitrión, o Pontevedra R.C., 19-7 no mesmo escenario pero en sesión de tarde.
Pese a ver o seu primeiro plantel estrearse coma campión de Copa, a directiva dos Ingleses, co seu presidente, Fito Brea, á cabeza, amosábase onte especialmente contenta polo triunfo dos Sub-18. Porque mentres os maiores gañaban un torneo sen os dous equipos galegos na División de Honra B e os dous mellores da Primeira Autonómica, os Sub-18 dobregaron hai 10 días nas semifinais o campión de Liga, o P.R.C., e onte á maior canteira do rugbi galego.