«Cando decidín volver vencellarme ao remo, era para volver. E no remo falar dun ciclo é facelo de 2-3 anos». O grovense Fran González vén de confirmar que cumprirá o seu terceiro ano consecutivo na súa segunda etapa á fronte da traíña do C.R. Mecos-Isabel.
Dito isto, a prioridade de Fran González é tentar amarrar a continuidade do groso do plantel co que neste 2018 levou a A Mequiña a repetir o terceiro posto na Liga Galega de Traíñas.
«Para conseguir que o ciclo sexa excelente necesitas que sigan como mínimo o 85 % dos remeiros», di. E a falta de pechar o novo plantel, o técnico confía en que «a maior parte do bloque vai seguir». Con el, «a ilusión, o ideal, é que a traíña se clasifique para o play-off de ascenso á ACT». Pero, advirte Fran González, «hai que ser conscientes de que acaba de baixar Tirán, e que este ano fumos terceiros pelexando con Ares, porque Meira estaba por enriba».