A espada de Araceli Bugallo tira o undécimo posto no Campionato do Mundo Master
AROUSA
A cambadesa foi apeada no cadro final de 16 pola número 1 do ránking, a británica Usher, que rematou sumando o título ao de campioa de Europa
19 oct 2023 . Actualizado a las 18:58 h.A un só chanzo do Top Ten. Así rematou a pasada fin de semana a tiradora cambadesa Araceli Bugallo a súa participación no Campionato do Mundo de Esgrima Master, que reuniu a centos de especialistas nas tres modalidades de armas —espada, florete e sabre— no Ocean Centre de Daytona, Florida (EE.UU).
Na categoría de espada feminina de máis de 50 anos, Bugallo, responsable da Asociación Vilagarcía Esgrima, foi a mellor das catro españolas en competición, rematando no undécimo posto apeada pola finalmente campioa do mundo.
A arousá resolveu a súa poule con catro vitorias e dúas derrotas. Superando a ucraína Tetiana Novoselka (5-2), a xaponesa Ayako Mitsui (5-2), a canadiana Natalie Gagnon (5-1) e a alemá Julia Ehlermann (5-3) e perdendo ante a francesa Carole Charroy (5-3) e a estadounidense Ann Marie Totemeier (3-2). Ao rematar décimo sexta a rolda de poules, Bugallo quedou exenta do primeiro cadro de asaltos directos. No de 32 venceu a suíza Martina Valaer 10-8. Pero no de 16 non puido coa número 1 do ránking, a británica Georgina Usher, que en Daytona sumou a coroa mundial á europea.