O cadro vilagarcián encadea tres vitorias e outros tantos empates
27 ene 2024 . Actualizado a las 05:00 h.O Arousa recibe hoxe ás 17 horas o C.D. Choco na décimo oitava xornada da Liga de División de Honor Juvenil. No céspede do Campo Municipal de Zacande (Meis) enfróntanse dous conxuntos da zona media-alta da clasificación do Grupo 1, co cadro vilagarcián sexto con 25 puntos, polos 23 do redondelán.
Os pupilos de Perú aspiran a continuar a súa excelente xeira, con tres triunfos e outros tantos empates encadeados, cun 0-0 no campo do Lugo como último resultado ata hoxe. O Choco, pola súa banda, vén de derrotar a outro rival da zona baixa da táboa, o Atl. Perines, 3-0, logo de igualar nos seus dous encontros precedentes.
O adestrador do Arousa agardaba onte un marcador curto, como o que na primeira volta lle deu a vitoria ao seu equipo en Redondela por 0-1. Diante, salienta, un rival que «se manexa en moitas situacións, moi agresivo, que xoga profundo e moi alegre en ataque, tanto por fóra coma por dentro, e con xogadores con bo disparo».