O Asmubal pon un pé de regreso á Primeira Autonómica tras unha volta enteira sen gañar
AROUSA
As de Juan Manuel Costas perderon co
10 mar 2024 . Actualizado a las 05:00 h.Ao longo dunha liga hai partidos, e partidos. O que enfrontaba a última hora da tarde de onte o Inelsa Solar Asmubal Meaño co pechacancelas do Grupo A da División Honor Plata Femenina no Pabellón Mariano Haro era a máis básica das varas de medir o nivel de capacidade e de afán de resiliencia dun grupo en caída libre desde a perda da central Eli Méndez, o seu faro, no primeiro treito da competición. E o 30-27 a mans do Palencia Turismo non fixo máis ca debuxar a imaxe do conxunto meañés cun pé de volta na Primeira Autonómica Galega.
As de Juan Manuel Costas non foron quen de competir ante o peor equipo da Liga máis ca un cuarto de hora. Do 5-4 pasouse no minuto 20 a un 9-4, que se disparou ata o 17-9 no descanso, sen que o recurso do adestrador visitante a un tempo morto no minuto 19 surtise efecto.
Tras case dobrar no marcador o seu hóspede, o Palencia Turismo foise nove arriba no arrinque da segunda parte, nese momento no que o Asmubal Meaño debería ter demostrado a súa capacidade de resposta ante a adversidade, de realmente tela. De sete gañaba inda o conxunto local a falta só duns últimos cinco minutos nos que a súa vítima conseguiu a lo menos salvar o diferencial de goles entre os dous equipos de cara a un hipotético desempate pola permanencia.
Sabela Miniño, con sete tantos, foi a máxima anotadora do Asmubal Meaño, relegado agora polo Palencia Turismo, que sae do décimo cuarto e último posto para desafiuzar do segundo as de Juan Manuel Cores, agora décimo terceiras e penúltimas cos mesmos 12 puntos co novo pechacanchelas, o Siero. Con 13 puntos figuran o Palencia Turismo e o Rubensa Indupor Porriño B e con 14 o Oliveira & Faro Seaplast Cañiza. Estes son os cinco equipos chamados a pelexar por evitar o descenso nas catro xornadas que restan de calendario. O Asmubal perdeu doce dos seus trece últimos partidos, empatando o restante e completando unha volta sen gañar. A súa última vitoria data do 18 de novembro, precisamente ante o Palencia: 33-28.